बायणात पाचटनांपैकी एक टन तांदूळ गायब

बायणात नागरी पुरवठा खात्याचा छापा

वास्को, दि. ६ (प्रतिनिधी)
बायणा - वास्को येथील ‘पी. डिमेलो एजीएल कंझ्युमर सोसायटी’च्या स्वस्त धान्याच्या दुकानात आलेल्या तांदळाच्या साठ्यापैकी काही तांदूळ परस्पर विकण्यात आल्याच्या तक्रारीवरून आज संध्याकाळी नागरी पुरवठा खात्याने येथे छापा टाकला. त्यात काल दि. ५ रोजी पाठवण्यात आलेल्या पाच टन तांदळाच्या साठ्यातील एक टन साठा गायब असल्याचे उघडकीस आले व त्यानुसार निरीक्षकांनी अहवाल तयार केला आहे.
आज संध्याकाळी बायणा येथील खाप्रेश्‍वर मंदिरासमोर असलेल्या सदर दुकानावर नागरी पुरवठा खात्याचे निरीक्षक दत्तेश साखरदांडे यांनी हा छापा टाकला. रेशनकार्ड धारकांसाठी येत असलेल्या साठ्यातील काही तांदूळ परस्पर विकला जात असल्याची माहिती मुरगाव मामलेदारांना मिळताच त्यांनी या प्रकरणी आपल्याला छापा टाकण्याचे आदेश दिल्याचे श्री. साखरदांडे यांनी सांगितले. त्यानुसार येथे टाकण्यात आलेल्या छाप्यात आलेल्या पाच टन तांदळांपैकी एक टन तांदूळसाठा गायब झाल्याचे निदर्शनास आल्याची माहितीही त्यांनी दिली. सदर दुकानात काल तांदळाची १०३ पोती आली होती; पैकी आज केवळ ८१ पोती तांदूळच सापडला, असेही ते म्हणाले. या छाप्यादरम्यान दुकानाचे सचिव कृष्णा फडते यांची जबानी नोंद करण्यात आली असून विक्री नोंदणी वही जप्त करण्यात आली आहे. दरम्यान, वास्कोतील विविध भागांत धान्याची कमतरता भासत असून तिथेही असेच प्रकार सुरू असण्याची शक्यता आहे. त्यामुळे खात्याने ही छापा मोहीम सुरूच ठेवावी, अशी मागणी होत आहे.