Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Monday 2 May, 2011

खांडू यांचा ठावठिकाणा नाही

उलटसुलट बातम्यांमुळे गोंधळ

इटानगर, दि. १
अरुणाचल प्रदेशचे मुख्यमंत्री दोरजी खांडू शनिवारी सकाळी तवांगहून हेलिकॉप्टरने इटानगरला येत असताना बेपत्ता झाले असून अजूनही त्यांचा शोध सुरूच आहे. यासंदर्भात उलटसुलट बातम्या दिल्या जात असल्यामुळे गोंधळजनक स्थिती निर्माण झाली होती. मुख्यमंत्री अथवा त्यांचे हेलिकॉप्टर यासंदर्भात कोणतीही ठोस माहिती उपलब्ध झालेली नाही. मुख्यमंत्र्यांचा शोध घेण्यासाठी पाठवलेल्या पथकांच्या कामात प्रतिकूल हवामानाचा व्यत्यय आला आहे.
मुख्यमंत्र्यांसोबत चारजण शनिवारी हेलिकॉप्टरने प्रवास करून इटानगर येथे येणार होते. मात्र सकाळी ९.५६ वाजता उड्डाण केल्यानंतर पुढील २० मिनिटांतच हेलिकॉप्टरचा नियंत्रण कक्षाशी असलेला संपर्क तुटला. तेव्हापासून आतापर्यंत मुख्यमंत्री, त्यांचे सहकारी आणि हेलिकॉप्टर यांचा पत्ता लागलेला नाही. २४०० सैनिक, भारत-तिबेट सीमा पोलीस दलाचे १५० जवान आणि तीन हेलिकॉप्टर्सच्या मदतीने तवांग आणि तेंगाच्या पर्वतीय परिसरात शोध मोहीम सुरू आहे. भूतान सरकारनेही स्वतःच्या सीमावर्ती भागात शोध मोहीम सुरू केली आहे. घनदाट जंगल आणि प्रतिकूल हवामानामुळे शोध मोहिमेत वारंवार अडथळे येत आहेत.
हवाई दलाची दोन सुखोई-३० विमाने विशेष रडारच्या मदतीने घनदाट जंगलाचा कोपरा न कोपरा तपासत आहेत. लष्कराची दोन चेतक हेलिकॉप्टर आणि हवाई दलाचे एक एमआय-१७ हेलिकॉप्टर यांनी जंगल परिसरात वारंवार घिरट्या घालून शोध आरंभला आहे. मात्र अद्याप त्यांच्या या प्रयत्नांना यश आलेले नाही. ही माहिती सरकारी प्रवक्त्याने दिली.
इस्रोची मदत घेणार
गायब झालेल्या हेलिकॉप्टरचा कसून शोध सुरू असून, आता शोधासाठी इस्त्रोची मदत घेण्यात येणार आहे. या हेलिकॉप्टरमध्ये तांत्रिक बिघाड झाल्याने ते अरुणाचल प्रदेशातील तवांग या भागाजवळ, परंतु भूतानच्या हद्दीत उतरवावे लागले, असे मुख्यमंत्र्यांच्या कार्यालयातून सुरवातीस सांगण्यात आले; मात्र ही माहिती चुकीची असल्याचे शनिवारी सायंकाळी स्पष्ट करण्यात आले. हेलिकॉप्टर अजूनही बेपत्ता असल्याचे केंद्रीय गृहसचिव गोपाल के. पिल्ले यांनी सांगितले. खंडू यांच्या शोधासाठी इस्त्रोची मदत घेण्यात येणार असून, त्यामुळे त्यांचे हेलिकॉप्टर कोणत्या परिस्थितीत आहे याची माहिती मिळणार असल्याचे पिल्ले यांनी सांगितले. मुख्यमंत्री खांडू यांच्यासोबत तवांगचे आमदार त्सेवांग धोंडूप यांची बहीण येशी लामू, सुरक्षारक्षक येशी चोड्डक असे दोघे जण, तसेच हेलिकॉप्टरमधील कर्मचारी कॅप्टन जे. एस. बब्बर व कॅप्टन के. एस. मलिक आहेत.
एकाच इंजिनचे हेलिकॉप्टर
पवनहंसच्या ज्या हेलिकॉप्टरने मुख्यमंत्री दोरजी खांडू हे तवांगहून इटानगरला येत होते त्या हेलिकॉप्टरला केवळ एकच इंजिन आहे. अशी जुनाट झालेली हेलिकॉप्टर्स प्रामुख्याने ईशान्येकडील राज्यांना उपलब्ध करून दिल्यामुळे मेघालयच्या मुख्यमंत्र्यांनी तीव्र संताप व्यक्त केला आहे.

No comments: