बनावट चहा पाकिटांच्या गोदामावर उसगावात छापा

पावणेचार लाखांची पाकिटे जप्त
पणजी, दि. ३ (प्रतिनिधी)
‘रुबी’ आणि ‘सोना’ कंपन्यांची नावे असलेल्या बनावट चहा पाकिटांच्या उसगावातील गोदामावर आज अन्न व औषधी खात्याच्या निरीक्षकांनी छापा टाकून ३ लाख ७६ हजार रुपये किमतीची चहाची पाकिटे जप्त केली. पाकिटांतील चहा पावडरही बनावट असल्याचा दावा खात्यातर्फे करण्यात आला आहे. त्याची चाचणी करण्यासाठी सदर चहा पावडरचे नमुने प्रयोगशाळेत पाठवल्याची माहिती खात्याचे संचालक सलीम वेलजी यांनी दिली.
अधिक माहितीनुसार, शिमोगा कर्नाटक येथील मोहम्मद ऊर्फ अहमद हा गेल्या काही महिन्यापासून ‘व्हीआरएल’ या ट्रान्सपोर्ट कंपनीतून फोंड्यात चहा पावडर पाठवत होता. उसगाव येथे असलेल्या या गोदामात ‘रुबी’ कोलकाता कंपनी व ‘सोना’ चहा कंपनी, आसाम असा पत्ता असलेल्या चहा पाकिटात ही पावडर भरली जात होती. याची माहिती मिळाल्यानंतर आज छापा टाकून खात्याने बनावट ‘रुबी’ कंपनीची प्रत्येकी ५ किलोची १८ पाकिटे तर सोना कंपनीची प्रत्येकी ५ किलोची ५२० पाकिटे जप्त केली. या सर्वांची किंमत बाजारात ३ लाख ७६ हजार रुपये होत असल्याची माहिती श्री. वेलजी यांनी दिली. सदर छापा अन्न व औषधी खात्याचे निरीक्षक राजाराम पाटील, आबेल रॉड्रिगीस व श्रद्धा कुटकर यांनी टाकला.
दरम्यान, सदर गोदामाला टाळे ठोकण्यात आले असून या चहा पावडरच्या नमुन्याचा चाचणी अहवाल आल्यानंतर पुढील कारवाई करण्यात येणार असल्याची माहिती यावेळी देण्यात आली.