म्हापसा नगराध्यक्षांवरील अविश्‍वास ठराव बारगळला

म्हापसा, दि. २ (प्रतिनिधी)
म्हापसा पालिका मंडळाच्या विरोधी गटाने नगराध्यक्ष सुधीर कांदोळकर यांच्यावर दाखल केलेला अविश्‍वास ठराव नगरसेविका रूपा भक्ता यांनी ऐनवेळी विरोधी गटाला आपला पाठिंबा दर्शविल्याने सात विरूद्ध शून्य मतांनी बारगळला.
अविश्‍वास ठरावावर सही करणारे ऍड. सुभाष नार्वेकर, उपनगराध्यक्ष विजेता नाईक, मायकल कारस्को, रुही पत्रे, रूपा भक्ता, आशिष शिरोडकर, दीपक म्हाडेश्री, सुभाष कळंगुटकर हे आठही नगरसेवक उपस्थित होते. तर सुधीर कांदोळकर यांच्या गटातील एकमेव नगरसेवक संदीप फळारी उपस्थित होते.
अविश्‍वास ठरावावर चर्चा करण्यासाठी बोलावण्यात आलेले उपजिल्हाधिकारी दशरथ रेडकर अध्यक्षस्थानी होते. त्यांना सहकार्य देण्यासाठी पालिका मुख्याधिकारी हनुमंत तोरस्कर होते.
यावेळी ऍड. नार्वेकर यांनी नगराध्यक्ष कांदोळकर यांच्यावर टीका केली. यावेळी त्यांनी सांगितले की, विरोधी गटाने आठ नगरसेवकांचा एक गट स्थापन केला असून पालिका मंडळ आम्ही चालवू शकतो असा दावा केला. यावेळी श्री. फळारी यांनी श्री. नार्वेकर यांनी केलेले सर्व आरोप फेटाळून लावले. म्हापशाच्या विकासासाठी येणार्‍या सरकारी अनुदानापैकी प्रत्येक प्रभागासाठी पाच पाच लाख रुपये देण्याचा तरतूद केली आहे तर प्रत्येक नगरसेवकाला विकासासाठी प्रत्येकी दोन लाख रुपये देण्याचा प्रस्ताव मांडला आहे. कचरा प्रश्‍नावर वाटाघाटी चालू आहेत. बेकायदा कामांवर नियंत्रण ठेवण्याचे काम मुख्याधिकार्‍यांचे आहे. त्यांना तशी संपूर्ण स्वायत्तता दिलेली आहे. ऍड. नार्वेकर यांनी केलेले सर्व आरोप बिनबुडाचे असून हे आरोप श्री. फळारी यांनी धुडकावून लावले. सभेचे अध्यक्ष श्री. रेडकर यांनी मतदानाची सूचना केली. त्यावेळी श्रीमती भक्ता यांनी आपण मतदानात भाग घेणार नसल्याचे जाहीर केले. यावेळी आपण तटस्थ राहणार असल्याचे त्या म्हणाल्या. त्यामुळे ठरावाच्या बाजूने सात मते पडल्याने हा ठराव बारगळला.
यावेळी बोलताना श्रीमती भक्ता यांनी सांगितले की, नगराध्यक्ष श्री. कांदोळकर यांना कामासाठी फक्त पाच महिन्यांचा अवधी मिळाला असून तो अवधी वाढावा म्हणून आपण हा निर्णय घेतल्याचे त्या म्हणाल्या. यावेळी श्री. कांदोळकर यांनी भक्ता यांचे आभार मानले.
दरम्यान, पालिकेत संगीतखुर्चीचा खेळ सुरू होऊन विकास मागे पडू नये म्हणून विद्यमान नगराध्यक्षांनाच कार्यरत ठेवावे याकडे आमचा कल होता अशी प्रतिक्रिया म्हापसा कॉंग्रेस ब्लॉक कमिटीने दिली आहे.

फ्रान्सिस डिसोझा यांचा फोटो घेणे
प्रामाणिकपणा हाच लोकशाहीचा आधार
काही नेत्यांना पैशांचा एवढा माज चढला आहे की त्यांना आपण पैशांच्या बळावर कुणालाही विकत घेऊ शकतो, असेच वाटते. प्रत्येक व्यक्ती ही अप्रामाणिक किंवा विकली जाऊ शकत नाही. या समाजात अजूनही काही प्रामाणिक माणसे आहेत व त्यांच्यामुळेच आपली लोकशाही टिकून आहे, अशी जळजळीत प्रतिक्रिया म्हापशाचे आमदार फ्रान्सिस डिसोझा यांनी व्यक्त केली. म्हापसा पालिकेतील काही नगरसेवकांना पैशांचे आमिष दाखवून आपल्या बाजूने ओढण्याचे प्रयत्न झाले. पण पालिकेतील काही प्रामाणिक नगरसेवकांनी आपल्या कृतीद्वारे हा डाव उधळून लावला. नगराध्यक्ष सुधीर कांदोळकर यांच्याविरोधातील अविश्‍वास ठराव बारगळला व अखेर प्रामाणिकपणाचाच विजय झाला, असेही ते म्हणाले.