बोगदा येथील १३ बांधकामे जमीनदोस्त

वास्को, दि. ३ (प्रतिनिधी)
दीड वर्षापूर्वी बोगदा येथील सरकारी जागेत बेकायदेशीररीत्या उभारण्यात आलेल्या १३ पत्र्यांच्या बांधकामांवर मुरगाव नगरपालिकेने कारवाई करून त्यांना जमीनदोस्त केले. ‘कारगवाल ऍण्ड कंपनी’ ह्या कंत्राटदार आस्थापनाने सदर बेकायदा बांधकामे उभारली होती व येथे ४०० कामगारांना ठेवले होते. २४ तासांत सदर बांधकामे हटवण्याचे आदेश पालिकेने जारी केले होते.
सदर ठिकाणी शौचालयाची तसेच अन्य सुविधा उपलब्ध करून देण्यात आल्या नसल्याने या भागातील रहिवाशांना असह्य दुर्गंधी सहन करावी लागत होती. याप्रकरणी मुरगावचे आमदार मिलिंद नाईक यांनी नगरपालिकेला अवगत करून सर्वेक्षण करण्यास भाग पाडल्यानंतर पालिकेने आज ही बेकायदा बांधकामे जमीनदोस्त केली. बोगदा येथील मुरगाव पोलिस स्थानकाच्या मागे असलेल्या सुमारे चार हजार चौरस मीटर सरकारी जागेत ही बांधकामे उभारण्यात आली होती. कारवाईदरम्यान कडक पोलिस बंदोबस्तही ठेवण्यात आला होता व पालिकेचे अधिकारीही जातीने उपस्थित होते.
मिळालेल्या माहितीनुसार, दीड वर्षापूर्वी सरकारी जागेत उभारलेल्या या बांधकामांना पालिकेची तसेच इतर कुठल्याच प्रकारची कायदेशीर परवानगी नव्हती. अंदाजे ४०० बिगर गोमंतकीय कामगार येथे वास्तव्य करून होते. मात्र अन्य सुविधांच्या अभावामुळे येथे गलिच्छ वातावरण निर्माण झाले होते. मुरगाव बंदराच्या एका धक्क्याचे काम करण्यासाठी कंत्राटदाराने या कामगारांना आणल्याचे समजते. या प्रकाराबाबत पालिकेला अनेकदा कळवण्यात आले होते. दरम्यान, तरीही कारवाई होत नसल्याने आमदार मिलिंद नाईक यांनी पुढाकार घेऊन शेवटी हा प्रश्‍न धसास लावला.
आजच्या कारवाईत नगरपालिकेचे कनिष्ठ अभियंता विशांत नाईक, जे. मिस्किता व रामचंद्र हरजी उपस्थित होते. तसेच पालिकेचे दोन निरीक्षक व मुरगावच्या पोलिस पथकांनी बंदोबस्त ठेवला होता.