कुटुंबातील दोघांना तिकीट नाही, पण...

पणजी, दि. ४ (प्रतिनिधी)
एकाच कुटुंबातील दोघांना उमेदवारी न देण्याचे धोरण कॉंग्रेसने सर्वत्र राबवले आहे व गोव्यातही त्याची काटेकोरपणे अंमलबजावणी केली जाईल, असे स्पष्ट संकेत जगमितसिंग ब्रार यांनी आज दिले. मात्र, काही ठिकाणी प्रबळ उमेदवार मिळणे अशक्य होते व अशा वेळी एखादप्रसंगी एकाच कुटुंबातील अन्य सदस्याला तिकीट देण्याचा पर्याय राहतो; पण त्याबाबतचा अंतिम निर्णय हा श्रेष्ठींकडूनच घेतला जातो, असे म्हणून त्यांनी या बाबतच्या पळवाटेचीही तजवीज करून ठेवली.
कॉंग्रेस पक्षातील अनेक नेत्यांकडून सध्या आपल्या कुटुंबातील सदस्यांना विविध मतदारसंघांत ‘प्रोजेक्ट’ करण्याची स्पर्धा सुरू झाली आहे. या प्रकाराबाबत आज पत्रकारांनी श्री. ब्रार यांना छेडले असता तेही काही प्रमाणात गडबडले. एकाच कुटुंबातील दोघांना उमेदवारी देण्यास कॉंग्रेसची हरकत आहे व हे धोरण सर्वत्र राबवले जाते, असे ते म्हणाले. काही ठिकाणी पक्षाला एकही प्रबळ उमेदवार सापडत नाही व अशा वेळी एखाद्या नेत्याच्या कुटुंबातील अन्य सदस्याला उमेदवारी देणे भाग पडते. पण याबाबतचा अंतिम निर्णय श्रेष्ठींकडूनच घेतला जातो व तो केवळ अपवादात्मक असतो, असे म्हणून त्यांनी आपली सुटका करून घेतली.