इंजिनिअरिंग परीक्षेमध्ये पेपरफुटीमुळे गोंधळ

मडगाव, दि. १ (प्रतिनिधी)
अखिल भारतीय स्तरावरील इंजिनियरींग प्रवेशासाठींच्या आज झालेल्या परीक्षांची एक प्रश्नपत्रिका फुटल्यामुळे या परीक्षांना आज प्रत्येकी दोन तास विलंब झाला. त्यामुळे सायंकाळचा पेपर तर तब्बल साडेसातपर्यंत चालला. या प्रकारामुळे परीक्षेस बसलेल्या विद्यार्थ्यंवर प्रचंड मानसिक ताण आला तर एक पेपर चक्क पुढे ढकलला गेला.
गोव्यात मडगाव, वास्को व पणजी अशी त्याची तीन केंद्रे असून कर्नाटक, केरळ, महाराष्ट्र व गोवा या चार राज्यातील विद्यार्थ्यांसाठी येथे सोय केलेली होती. त्यात तीस टक्के विद्यार्थी गोव्यातील होते. मिळालेल्या माहितीनुसार मडगाव केंद्रातील या परीक्षा सां जुझे आरियाल येथील एका नावाजलेल्या खासगी शाळेत पार पडल्या. सकाळी १० वा. व्हावयाचा पेपर दुपारी १२ वाजता सुरु झाला व तो ३ वाजता संपला तर सायंकाळचा पेपर ४.३० वाजता सुरु झाला तो ७.३० वाजता संपला.
आर्किटेक्चरल प्रवेशासाठीचा वेगळा पेपर त्यामुळे पुढे ढकलला गेला असे समजते.