बाबूश, नार्वेकरांना श्रेष्ठींकडून चंपी

पणजी, दि. ४ (प्रतिनिधी)
विदेशी चलन तस्करी प्रकरणी कस्टम्सच्या कचाट्यात सापडलेले शिक्षणमंत्री बाबूश मोन्सेरात व सत्ताधारी पक्षाचे घटक असूनही सरकारवर टीका करणारे हळदोण्याचे आमदार ऍड. दयानंद नार्वेकर या दोघांनाही श्रेष्ठींनी चांगलीच चंपी दिली आहे. आज इथे पत्रकार परिषदेत बोलताना जगमितसिंग ब्रार यांनी केलेल्या खुलाशाअंती ही माहिती उघड झाली.
विदेशी चलन तस्करी प्रकरणात अडकलेल्या शिक्षणमंत्री बाबूश मोन्सेरात यांनी आपली सारी कागदपत्रे कॉंग्रेस श्रेष्ठींसमोर सादर केली. विदेशात जाताना किती प्रमाणात चलन न्यावे याबाबत अनभिज्ञ असल्यानेच आपल्याकडून ही चूक घडली, अशी कबुली त्यांनी श्रेष्ठींसमोर दिल्याचे श्री. ब्रार म्हणाले. एका जबाबदार मंत्र्यांकडून अशा पद्धतीच्या चुका घडल्यास पक्षाची प्रतिमा मलीन होते व यापुढे असले प्रकार अजिबात खपवून घेतले जाणार नाहीत, अशी ताकीद त्यांना श्रेष्ठींनी दिल्याचेही ते म्हणाले. बाबूश यांनी प्रांजळपणे आपली चूक मान्य केल्याने, यापुढे अशी चूक होणार नसल्याची हमी दिल्याने व ही त्यांची पहिलीच चूक असल्याने त्यांना माफ केले, असेही ते म्हणाले.
नार्वेकरांचेही कान उपटले
हळदोण्याचे आमदार तथा माजी वित्तमंत्री ऍड. दयानंद नार्वेकर हे विधानसभेत व जाहीर कार्यक्रमांत आपल्याच सरकारवर टीका करीत असल्याच्या तक्रारी श्रेष्ठींकडे पोचल्याने त्याचीही गंभीर दखल श्रेष्ठींनी घेतली आहे. विधानसभेत ऍड. नार्वेकर यांच्याकडून प्रामुख्याने मुख्यमंत्री दिगंबर कामत यांना लक्ष्य बनवण्याचा प्रकार घडला आहे. सरकारच्या इतर मंत्र्यांवरही त्यांनी आरोप केले आहेत. सरकारातील एक ज्येष्ठ नेताच जर अशी टीका करायला लागला तर जनतेत चुकीचा संदेश जाण्याची शक्यता आहे. ऍड. नार्वेकर यांना आपल्या वागण्यात बदल करण्याची ताकीद देण्यात आली आहे. आपल्याच सरकारला बदनाम करण्याचा हा प्रकार यापुढे अजिबात खपवून घेतला जाणार नाही, असेही नार्वेकरांना बजावण्यात आले असून झाल्या प्रकाराबद्दल त्यांनी खंत व्यक्त केल्याचा गौप्यस्फोटही श्री. ब्रार यांनी केला.