दोरजी खांडू यांचा मृतदेह सापडला

कुटुंबीय सदस्यांनी ओळख पटविली


इटानगर/नवी दिल्ली, दि. ४
अरुणाचल प्रदेशचे मुख्यमंत्री दोरजी खांडू आणि अन्य चौघांसह उड्डाणघेणार्‍या हेलिकॉप्टरचे अवशेष आज सापडले असून, या अवशेषांच्या बाजूलाच मुख्यमंत्री खांडू यांच्यासह अन्य चौघांचेही मृतदेह छिन्नविच्छिन्न अवस्थेत आढळून आले आहेत. पर्वतीय भागात एका पहाडाला धडक बसल्यानंतर हेलिकॉप्टरला अपघात झाला असल्याची शक्यता व्यक्त करण्यात आली आहे. दरम्यान, कुटुंबीय सदस्यांनी खांडू यांच्या मृतदेहाची ओळख पटविली आहे.
पवन हंसच्या युरो बी-८ या हेलिकॉप्टरमधून दोरजी खांडू आणि इतर चार जणांनी गेल्या शनिवारी तवांगहून उड्डाण केले होते. त्यानंतर काही वेळातच हेलिकॉप्टरचा हवाई वाहतूक नियंत्रण कक्षासोबतचा संपर्क तुटला होता. खांडू यांच्यासोबतच अपघातात ठार झालेल्यांमध्ये वैमानिक कॅप्टन जे. एस. बब्बर, कॅप्टन टी. एस. मामिक, खांडू यांचे सुरक्षा अधिकारी व्ही. चोड्डाक आणि वाय. लामू तसेच तवांगच्या आमदाराची बहीण सेवांग धोंदूप यांचा समावेश आहे.
या घटनेची माहिती देताना केंद्रीय गृहमंत्री पी. चिदंबरम म्हणाले की, अतिशय वाईट बातमी आज कानावर आली आहे. अपघातग्रस्त हेलिकॉप्टरचे अवशेष केला आणि लोबोथांग या भागात आढळून आले आहेत. हेलिकॉप्टरच्या अवशेषांजवळ काही लोकांचे मृतदेह आढळून आले आहेत. हे मृतदेह खांडू आणि त्यांच्यासोबत असलेल्या अन्य चार जणांचे असण्याचीच शक्यता जास्त आहे. खांडू यांच्या मृत्यूची शासकीय स्तरावरून अद्याप घोषणा करण्यात आली नाही. तथापि, ईशान्य भागाच्या विकासासाठी असलेले केंद्रीय मंत्री बी. के. हांडिक यांनी सांगितले की, खांडू यांच्या नातेवाइकांनी मृतदेहाची ओळख पटविलेली असून, तो मृतदेह खांडू यांचाच असल्याची पुष्टी केली आहे. आज सकाळी जवळच राहणारे काही नागरिक पर्वतीय भागात आले असता त्यांना हेलिकॉप्टरचे अवशेष दिसून आले. त्यांनी लगेच माहिती कक्षाला कळविले. त्यांनी दोन मृतदेहांची ओळख पटविली असून, अन्य तिघांचे मृतदेह ओळख पटण्याच्या पलीकडे जळाले आहेत, असे हांडिक म्हणाले.