जगदीश खेबुडकर यांचे देहावसान

कोल्हापूर, दि. ३(प्रतिनिधी)
भक्तिपर गाणी असोत की लावणी... आपल्या प्रतिभेच्या जोरावर या दोन्ही काव्यप्रकारांना एकाच वेळी समर्थपणे हाताळणारे, मराठी चित्रपटसृष्टीला अनेक अजरामर गीतांची देणगी देणारे ज्येष्ठ गीतकार जगदीश खेबुडकर यांचे आज कोल्हापूर येथे खाजगी इस्पितळात निधन झाले. ते ७९ वर्षांचे होेते.
काही दिवसांपूर्वी श्‍वास घेण्यास त्रास होत आहे, अशी तक्रार त्यांनी केल्याने त्यांना इस्पितळात दाखल करण्यात आले. प्रारंभी त्यांनी वैद्यकीय उपचारांना चांगला प्रतिसादही दिला. परंतु, नंतर त्यांची प्रकृती खालावत गेली. अखेर किडणी निकामी झाल्याने आज दुपारी त्यांनी शेवटचा श्‍वास घेतला. त्यांच्या निधनाने मराठी चित्रपटसृष्टीत शोककळा पसरली आहे. उद्या बुधवारी सकाळी ९ वाजता त्यांच्या पार्थिवावर अंत्यसंस्कार केला जाणार आहे.
प्रतिभावंत गीतकार असलेले जगदीश खेबुडकर यांना ‘मृत्युंजय’कार शिवाजी सावंत पुरस्कार मिळालेला आहे. शिक्षक असलेले खेबुडकर तसे बहुआयामी व्यक्तिमत्त्व होते. सुधीर ङ्गडके, पं. भीमसेन जोशी, वसंतराव देशपांडे, प्रभाकर कारेकर यांच्यापासून ते थेट अलीकडच्या सोनू निगमपर्यंत अशा ३६ गायक व ३६ गायिकांनी त्यांची गाणी लिहिली आहेत. किरकोळ शरीरयष्टी असलेल्या व ‘नाना’ म्हणून ओळखल्या जाणार्‍या जगदीश खेबुडकरांनी आपली पहिली कविता १९४८ मध्ये लिहिली. १९५६ रोजी त्यांचे पहिले गीत आकाशवाणीवरून प्रक्षेपित झाले. १९६० मध्ये त्यांचे पहिले चित्रगीत प्रेक्षकांसमोर आले. हे गीत म्हणजे ‘मला हो म्हणत्यात लवंगी मिरची’ ही लावणी होती. अलीकडेच त्यांनी लिहिलेले ‘मोरया, मोरया...’ हे गीत अजय-अतुलने संगीतबद्ध केले आहे.
व्ही. शांताराम, भालजी पेंढारकर, अनंत माने, कमलाकर तोरणे आदींबरोबर काम करण्याची संधी त्यांना मिळाली. आयुष्याचा सूर्य मावळत असताना त्यांच्या लेखणीतून मात्र कविता, लावण्या, अभंग रचले जात होते. त्यांनी आत्तापर्यंत ३२५ चित्रपटांसाठी अडीच हजार चित्रगीते लिहिली आहेत. साडेतीन हजार कविता, २५ पटकथा, ५० लघुकथा, पाच नाटके, चार दूरदर्शन मालिका, चार टेलीङ्गिल्म्स एवढी भारदस्त साहित्य संपदा किरकोळ शरीरयष्टी असलेल्या खेबुडकरांच्या खाती आहे.
‘गणगवळण’ या चित्रपटासाठी त्यांनी सर्वाधिक म्हणजे १९ गीते लिहिली. ‘दुर्गा आली घरा’ या चित्रपटात त्यांचे १६ मिनिटांचे गीत आहे.