तीनअपघातांत तिघांचा मृत्यू

तीन अपघात, तिघे ठार

मडगाव, दि. ६ (प्रतिनिधी)
राज्यात काल रात्रीपासून तीन वेगवेगळ्या ठिकाणी झालेल्या अपघातांत तिघे ठार झाले. यांतील दोन अपघात मडगाव परिसरात तर एक वास्कोत झाला. मडगावातील पहिला अपघात फातोर्डा येथे दामोदर लिंगाजवळील जंक्शनवर घडला व त्यात जेसन ब्रागांझा हा ४१ वर्षीय बुलेटस्वार जागीच मरण पावला.
जेसन जे. जे. कॉस्ता इस्पितळाजवळ राहणारा असून दुपारी ३च्या सुमारास त्या रस्त्यावरून वेगात येत असताना त्याची मोटरसायकल मारुती सर्व्हिसेसच्या आवार भिंतीवर धडकली व डोके जमिनीला आदळून तो जागीच मरण पावला. मडगाव पोलिसांनी पंचनामा करून मृतदेह शवचिकित्सेसाठी पाठविला.
दुसरा अपघात रासय - लोटली येथील गोवन कॅरियर शिप कंपनीत झाला. तेथे वेल्डिंगचे काम करणारा प्रमोद निशाद हा २३ वर्षीय तरुण विजेचा धक्का बसून गंभीर जखमी झाला व इस्पितळात नेत असताना वाटेतच मरण पावला. मायणा - कुडतरी पोलिसांनी या अपघाताचा पंचनामा केला.
दरम्यान, आज सकाळी वास्को पोलिसांनी दाबोळी एनएसडी रस्त्याच्या बाजूला पडलेल्या नाग्या नामक इसमाचा मृतदेह ताब्यात घेतला असून तो काल मध्यरात्री ट्रकखाली सापडून ठार झाला असावा असा अंदाज आहे. होस्पेट, कर्नाटक येथील नाग्या इथे उभा करून ठेवलेल्या एका ट्रकखाली झोपल्याचा अंदाज असून सदर ट्रक त्याच्यावरून गेला असता त्यात तो ठार झाला असावा. सदर ठिकाणी एका इसमाचा मृतदेह असल्याची माहिती मिळताच वास्को पोलिसांनी घटनास्थळी जाऊन पंचनामा केला. अधिक चौकशीअंती दाबोळी येथील आलेक्स मायकल याच्या ट्रकवर ‘क्लीनर’ म्हणून तो काम करायचा, असे पोलिसांना समजले.