डॉ. प्रमोद सावंत आयुर्वेद कौन्सिलवर

पणजी, दि. ३० (प्रतिनिधी): गोव्यात पहिल्यांदाच घेण्यात आलेल्या सेंट्रल कौन्सिल ऑफ आयुर्वेदच्या निवडणुकीत भारतीय जनता पक्षाचे युवा मोर्चा अध्यक्ष डॉ. प्रमोद सावंत हे भरघोस मतांनी निवडून आले आहेत. राज्य आरोग्य संचालनालयाच्या कांपाल पणजी येथील मुख्यालयात घेण्यात आलेल्या या निवडणुकीत गोव्यातील २९७ आयुर्वेद डॉक्टरांनी भाग घेतला. यात डॉ. प्रमोद सावंत यांना १८९ मते मिळाली तर त्यांचे प्रतिस्पर्धी डॉ. महेश वेर्लेकर यांना १०८ मते प्राप्त झाली.
सेंट्रल कौन्सिल ऑफ आयुर्वेद ही संघटना देशातील आयुर्वेद डॉक्टरांचे प्रतिनिधित्व करत असून गोव्यातील एकमेव जागेसाठी ही निवडणूक पहिल्यांदाच घेण्यात आली. त्यात डॉ. सावंत यांनी बाजी मारली
‘‘भोंदू डॉक्टरांवर कारवाई करणार’’
गोव्यात आयुर्वेदाच्या कायदेशीर पदव्या न घेताच रुग्णांवर उपचार करणार्‍या भोंदू डॉक्टरांवर कारवाई करण्यावर आपण सर्वप्रथम भर देणार आहोत. तसेच गोव्यातील आयुर्वेद डॉक्टरांना त्यांचे अधिकार मिळवून देण्याबरोबरच त्यांना केंद्रीय मदत मिळवून देणे, गोवा सरकारचे आयुर्वेद डॉक्टरांच्या मागण्यांकडे लक्ष केंद्रित करून त्या सोडवणे, राज्यात आयुर्वेद केंद्र स्थापन व्हावे यासाठी प्रयत्न करणे व शिरोडा येथील आयुर्वेद महाविद्यालयात आयुर्वेद पदव्युत्तर शिक्षणाची सोय व्हावी यासाठी पावले उचलणे आदी कामे आपण प्राधान्यक्रमाने करणार असल्याचे डॉ. प्रमोद सावंत यांनी निवडून आल्यानंतर सांगितले. आपणास निवडून देणार्‍या सर्वांचे त्यांनी यावेळी आभार मानले.