Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Monday 2 May, 2011

पोलिस निरीक्षकासमोरच सिप्रियानोला भीषण मारहाण

पोलिस तक्रार प्राधिकरणाचा अहवाल
पणजी, दि. १ (प्रतिनिधी)
पोलिस तक्रार प्राधिकरणाच्या अहवालामुळे पोलिस कोठडीत मृत झालेल्या सिप्रियानो खून प्रकरणाने पुन्हा एकदा खळबळ माजवली आहे. पणजी पोलिस स्थानकात निरीक्षकाच्या कार्यालयाला लागून असलेल्या खोलीत सिप्रियानो याला लाथाबुक्क्यांनी मारहाण करून त्यानंतर त्याला मरेपर्यंत मारताना तत्कालीन निरीक्षक संदेश चोडणकर त्याठिकाणी उभे थांबून पाहत होते, अशी माहिती उघडकीस आली आहे. त्यामुळे पोलिस खात्यात खळबळ माजली आहे. या प्रकरणात निरीक्षक संदेश चोडणकर, उपनिरीक्षक राधेश रामनाथकर, दोन हवालदार व पोलिस शिपाई निलंबित झाले आहेत. या सर्व संशयतावर खुनाचा गुन्हा नोंद होऊनही अद्याप कोणालाही अटक करण्यात आलेली नाही. सदर अहवाल माजी न्यायाधीश तथा पोलिस तक्रार प्राधिकरणाचे अध्यक्ष युरीक डिसिल्वा यांनी तयार केला आहे.
दरम्यान, या प्रकरणातील एका संशयित पोलिस हवालदार संदीप शिरवईकर यांनी पोलिस प्राधिकरणाच्या सुनावणीविरुद्ध मुंबई उच्च न्यायालयाच्या गोवा खंडपीठात याचिका सादर करून स्थगिती मिळवली आहे. तर, ही स्थगिती उठवण्यासाठी ऊठ गोयकारा संघटनेचे ऍड. जतिन नाईक यांनी न्यायालयात आव्हान याचिका सादर करणार असल्याचे जाहीर केले आहे. सिप्रियानो याला पोलिस स्थानकात आठ पोलिस मरेपर्यंत मारहाण करताना त्याठिकाणी निरीक्षक संदेश चोडणकर उभे राहून पाहत होते, याचा स्पष्ट उल्लेख करण्यात आला आहे. दि. १४ मार्च २०११ रोजी पोलिस तक्रार प्राधिकरणाकडे रीतसर तक्रार करण्यात आली होती. पणजी पोलिस स्थानकातील काही पोलिसांच्या विरोधात ही तक्रार करण्यात आली होती. तपासाअंती आठ पोलिस अधिकारी दोषी आढळले आहेत.
अहवालात नमूद केल्यानुसार निलंबित पोलिस निरीक्षक चोडणकर व उपनिरीक्षक विजय चोडणकर हे दोघे सिप्रियानोच्या तोंडातून फेस येईपर्यंत लाथा मारीत होते. वैद्यकीय अहवालात त्याच्या मृत्यूचे कारण त्याच्या डोक्याला झालेल्या जखमेमुळे असण्याची शक्यता व्यक्त केली आहे. हवालदार संदीप शिरवईकर हे सिप्रियानोला बुक्क्यांनी मारत होते. तसेच, त्याचे केस ओढत होते. जीपमधून त्याला ओढत आणून निरीक्षकाच्या बाजूच्या खोलीत घेऊन गेले. तेथेही त्याला बेल्टने मारहाण केली. सिप्रियानो याला अटक करण्यासाठी विश्राम गावकर हे पोलिस हवालदार शिरवईकर यांच्याबरोबर गेले होते. त्यामुळे सिप्रियानो याला जीपमधून फरफटत ओढत नेऊन त्याला मरेपर्यंत मारहाण करण्यात श्री. गावकरही तेवढेच जबाबदार असल्याचे म्हटले आहे.

No comments: