आमदारकीचा राजीनामा देण्याचे आवाहन
पणजी, दि. ६ (प्रतिनिधी)
राष्ट्रवादी कॉंग्रेस पक्षाचे बाणावलीचे आमदार मिकी पाशेको हे पक्षासाठी आता न पेलणारे ओझे बनले आहेत. पक्षाचे एक जबाबदार आमदार असूनही पक्षावर उघडपणे टीका करण्याची त्यांची पद्धत पक्षशिस्तीचे उल्लंघन ठरत असल्याने त्यांनी तात्काळ पक्ष सदस्यत्व व आमदारपदाचा राजीनामा देणेच योग्य ठरेल, असे माहितीवजा आवाहन राष्ट्रवादीचे प्रवक्ते ट्रॉजन डिमेलो यांनी केले आहे.
आज राष्ट्रवादी कॉंग्रेस पक्षाच्या कार्यकारिणीची महत्त्वाची बैठक इथे झाली. या बैठकीत विविध विषयांवर गरमागरम चर्चा करण्यात आली. पक्षाची भूमिका जाणून न घेताच मिकी पाशेको यांनी माध्यमप्रश्नी उघडपणे एकतर्फी भूमिका घेतली; तसेच नवा पक्ष स्थापन करण्याचेही विधान करून त्यांनी उघडपणे आपल्याच पक्षाला आव्हान दिल्याने त्यांना आता पक्षात राहण्याचा कोणताच अधिकार राहत नाही, असेही ट्रॉजन डिमेलो म्हणाले. पणजी महापालिका निवडणुकीत पक्षाच्या कार्यकर्त्यांना पुढे काढून नंतर कच खाण्याच्या प्रकारामुळे पक्षाची बरीच नाचक्की झाल्याचा आरोप सरचिटणीस ऍड. अविनाश भोसले यांनी केला. राष्ट्रवादीच्या पॅनलचे अध्यक्ष बनूनही त्यांनी निवडणुकीत पक्षाचा प्रचार केलाच नाही, असा ठपकाही त्यांच्यावर ठेवण्यात आला.
दरम्यान, अवघड जागीचे दुखणे बनलेल्या मिकी पाशेको यांनी राजीनामा देण्यापेक्षा त्यांना पक्षातून बडतर्फ का केले जात नाही, असा सवाल केला असता तसे केल्यास ते असंलग्न आमदार म्हणून राहतील व ते पक्षाला अधिक मारक ठरेल, असेही यावेळी सांगण्यात आले.
Saturday 7 May, 2011
Subscribe to:
Post Comments (Atom)
No comments:
Post a Comment