प्रशांत फळदेसाई याचीही अटकपूर्व जामिनासाठी धाव

मडगाव, दि. १३ (प्रतिनिधी): ‘उटा’च्या आंदोलनावेळी बाळ्ळी येथे झालेल्या जाळपोळ व अन्य घटनांमधील प्रमुख संशयित आरोपी असलेल्या प्रशांत फळदेसाई याने अटकपूर्व जामिनासाठी अर्ज केला आहे. त्यावर २० जून रोजी सत्र न्यायालयात सुनावणी होणार आहे.
बाळ्ळी येथील हिंसक घटनांत प्रशांत याची मुख्य भूमिका असल्याचे प्रथमदर्शनी पुरावे गुन्हा अन्वेषण विभागाकडे आहेत. त्यामुळे त्याला चौकशीसाठी पाचारण केले होते. पण आपणास अटक होईल या भीतीमुळे तो फरारी झाला होता. नंतर गुन्हा अन्वेषण विभागाने त्याच्याविरुद्ध ‘लूक आउट’ नोटीस जारी केली होती. त्याचा दुसरा सहकारी दीपक फळदेसाई सध्या पोलिसांच्या ताब्यात आहे.
दरम्यान, याच प्रकरणात गुन्हा अन्वेषण विभागाने ताब्यात घेतलेले ‘उटा’ नेते गोविंद गावडे व मालू वेळीप यांनी जामिनावर सुटका व्हावी म्हणून केलेल्या अर्जावर आज युक्तिवाद झाला. त्यावरील निवाड्यासाठी १६ जून ही तारीख प्रधान सत्र न्यायाधीश बिंबा थळी यांनी मुक्रर केली आहे.