जितेंद्र देशप्रभूंना अटक का नाही?

कोरगाव खाणप्रकरणी न्यायालयाचे ‘सीआयडी’वर ताशेरे
पणजी, दि. २९ (प्रतिनिधी): भाईड - कोरगाव बेकायदा खाण प्रकरणातील मुख्य संशयिताला अद्याप अटक केली नसल्याने ‘सीआयडी’ विभागावर जिल्हा सत्र न्यायालयाने कडक ताशेरे ओढले आहेत. या प्रकरणातील मुख्य संशयिताला राजकीय वजन असल्यानेच त्याला हात लावण्यात कुचराई होत असल्याचे निदर्शनास येते आहे, असा शेराही न्यायालयाने आपल्या आदेशात मारला आहे. गीतेश नाईक यांना जामीन मंजूर करताना दिलेल्या आदेशात न्यायालयाने सदर निरीक्षण नोंदवले आहे.
या प्रकरणात राष्ट्रवादी कॉंग्रेस पक्षाचे केंद्रीय सचिव जितेंद्र देशप्रभू हे मुख्य संशयित आरोपी असून त्यांच्यावर दि. ९ मे रोजी न्यायालयाच्या आदेशानुसार ‘सीआयडी’ने गुन्हा नोंद केला होता. यावेळी गीतेश नाईक यांनी आपल्या जामिनासाठीच्या अर्जात, ‘सॉफ्ट टार्गेट’ असल्यानेच ‘सीआयडी’ने आपल्याला अटक केल्याचे म्हटले होते. तसेच, या प्रकरणातील मुख्य संशयित आरोपी जितेंद्र देशप्रभू यांच्यावर गुन्हा नोंद झालेला असतानाही त्यांना सोडून आपल्याला बळीचा बकरा बनवले जात असल्याचे न्यायालयाच्या निदर्शनास आणून दिले होते. देशप्रभूंना पोलिसांनी साध्या चौकशीलाही बोलावलेले नाही, असा दावाही गीतेश नाईक यांनी केला होता. न्यायालयाने या सर्व बाबींची दखल घेतली आहे.
‘सीआयडी’ विभागाचे उपअधीक्षक चंद्रकांत साळगावकर हे या प्रकरणाचे तपास अधिकारी असून त्यांनी केलेल्या चौकशीनुसार, गीतेश नाईक आणि शाहनवाझ या दोघांनी भाईड - कोरगाव खाणीवरील बेकायदा खनिजाची वाहतूक करण्याचे कंत्राट घेतले होते. ‘साईकृपा रिसोर्स’ या नावाने त्यांनी त्यासाठी करार केला होता. तसेच, त्यांनी ‘युनायटेड मिनरल्स’ला ५ हजार मेट्रिक टन खनिज देण्याचे मान्य केले होते. त्यातील ४ हजार मेट्रिक टन खनिज त्यांनी ‘रॉयल्टी’ न भरता मायणा - डिचोली येथील तिंबलो कंपनीच्या प्लॉटवर नेऊन टाकले होते. सदर खनिज माल गीतेश नाईक यांनी पोलिस पथकाला नेऊन दाखवल्याचेही पोलिसांनी न्यायालयात केलेल्या आपल्या अर्जात म्हटले आहे.
सत्र न्यायालयाच्या ताशेर्‍यानंतरही मुख्य संशयिताला ताब्यात घेण्यास ‘सीआयडी’ विभाग हयगय करत असल्याने आश्‍चर्य व्यक्त करण्यात येत आहे. यापूर्वी मुंबई उच्च न्यायालयाच्या गोवा खंडपीठाने पोलिस - ड्रग माफिया साटेलोटे प्रकरणात ‘सीआयडी’ने केलेल्या तपासकामावर ताशेरे ओढले होते, हे विशेष!
----------------------------------------------------------------------
भाईड कोरगाव बेकायदा खाण प्रकरणात जामिनावर सुटलेला गीतेश नाईक याचा जामीन का रद्द करू नये, असा प्रश्‍न करून त्याला नोटीस बजावण्यात आली आहे. मुंबई उच्च न्यायालयाच्या गोवा खंडपीठाने गीतेश नाईक याला या विषयीची विचारणा करून आज नोटीस बजावली आहे. काशिनाथ शेटये यांनी गीतेश याला मिळालेल्या जामिनाला गोवा खंडपीठात आव्हान दिले होते.