दरवाढीचा भाजपकडून निषेध

पणजी, दि. १४ (प्रतिनिधी): केंद्रातील कॉंग्रेसप्रणीत संयुक्त पुरोगामी आघाडी सरकारने पेट्रोल दरात ५ रुपये प्रतिलीटर वाढ करून सर्वसामान्य लोकांच्या कंबरेत लाथ मारण्याचीच कृती केली आहे. ‘आम आदमी’चे कैवारी असल्याचा आव आणत असलेल्या ‘युपीए’ सरकारचा खरा चेहरा या कृतीमुळे उघडा पडल्याची प्रतिक्रिया भाजप विधिमंडळ गटाचे प्रवक्ते आमदार दामोदर नाईक यांनी व्यक्त केली आहे.
‘युपीए’ सरकारच्या चुकीच्या आर्थिक धोरणांमुळेच येथील ‘आम आदमी’ची अवस्था ‘जाम आदमी’ बनली आहे, असा टोलाही यावेळी आमदार दामोदर नाईक यांनी हाणला. पेट्रोल दरात झालेल्या या अन्यायकारक वाढीचा भाजपने निषेध केला आहे.
पेट्रोल दरवाढीचा फटका बहुतांश लोकांना बसणार असल्याचे सांगून गोव्यात अलीकडेच प्रसिद्ध झालेल्या आर्थिक सर्वेक्षणानुसार ५,२५,९१२ दुचाकी, १४,४४२ भाडेपट्टीवरील मोटरसायकल, ३७४३ रिक्षा, १,४४,५१७ खाजगी कार व जीप आदींची नोंदणी झाल्याचे म्हटले आहे. या विविध आकडेवारीनुसार येथील रस्त्यांवर ७,६५,५८८ वाहने धावतात व त्यातील ८० टक्के वाहने ही पेट्रोलवर चालणारी आहेत. यामुळे या पेट्रोलवाढीचा थेट फटका या सर्व लोकांना बसणार आहे.
विविध पाच राज्यांतील निवडणुकांचे निकाल जाहीर झाल्यानंतर लगेच हा निर्णय घेण्यात आला. केवळ मतांवर डोळा ठेवून हा निर्णय लांबणीवर टाकण्यात आला होता याचाही उलगडा या निमित्ताने झाला आहे. देशाबाहेरील कोट्यवधी रुपयांचा काळा पैसा परत मिळवण्यासाठी हे सरकार काहीच करीत नाही. निदान आतातरी सर्वसामान्य लोकांनी सरकारच्या या जनताविरोधी धोरणांचा विरोध करण्यासाठी रस्त्यावर उतरावे व हा निर्णय मागे घेण्यास सरकारला भाग पाडावे, असे आवाहनही त्यांनी केले. भाजप या पेट्रोलवाढीचा निषेध करीत असल्याचे सांगून ही वाढ त्वरित मागे घेण्यासाठी हा पक्ष राजकीय स्तरावर जोरदार प्रयत्न करेल, अशी हमी त्यांनी दिली आहे.