मडगाव नगराध्यक्षांविरुद्ध खदखदतोय असंतोष!

१० मे नंतर खांदेपालटाची शक्यता
मडगाव, दि. २४ (प्रतिनिधी): जवळ येऊन ठेपलेल्या विधानसभा निवडणुकीच्या तोंडावर सत्ताधारी कॉंग्रेसने सर्व नगरपालिकांत आपली समर्थक मंडळे असावीत या इराद्याने एका बाजूने आपले समर्थक नगराध्यक्ष नाहीत त्या पालिकांमध्ये अस्थैर्य माजविण्याचे उपद्व्याप सुरू केले आहेत. मात्र दुसर्‍या बाजूने सर्वच्या सर्व वीसही नगरसेवक सत्ताधारी कॉंग्रेसचेच असलेल्या मुख्यमंत्र्यांच्या मतदारसंघातील मडगाव नगराध्यक्षांना हटविण्यासाठी १९ नगरसेवक एकत्र आल्याची खात्रीलायक माहिती आहे. येत्या १० मे नंतर कोणत्याही क्षणी त्याचे प्रत्यंतर येण्याचे संकेत मिळत आहेत.
भाजप समर्थक नगराध्यक्ष असलेल्या म्हापसा नगरपालिकेत निवडणुका होऊन सहा महिने उलटण्यापूर्वीच सत्ताबदल करण्याच्या उपद्व्यापाला लागलेल्या कॉंग्रेससाठी मात्र हा राजकीय धक्का ठरला आहे. कारण सर्वच्या सर्व २० ही नगरसेवक निवडून देऊनही लोकांना चांगले प्रशासन देणे या मंडळींना शक्य होऊ नये हेच त्यातून सिद्ध होत असल्याचे मानले जात आहे.
मिळालेल्या माहितीनुसार, नगराध्यक्षा सुशीला नायक यांच्याबरोबर एकही नगरसेवक नाही. केवळ मुख्यमंत्र्यांमुळे त्या सर्वांनी त्यांना पसंती दर्शवली होती. पण त्यातून शहाणे न होता त्या इतरांना विश्‍वासात घेत नाहीत, क्षुल्लक क्षुल्लक बाबीही मुख्यमंत्र्यांकडे नेतात व सर्वांचीच अडचण करतात अशा इतर नगरसेवकांच्या तक्रारी आहेत. गत महिन्यात झालेल्या कार्निव्हल व शिगमा उत्सवांपासून त्यांनी अन्य नगरसेवकांना दूर ठेवले. त्या वेळेपासूनच त्यांच्याप्रति असंतोष खदखदत असून कोणत्याही क्षणी त्याचा स्फोट होणे शक्य आहे. मागे कोंबवाडा येथील कार्यक्रमावेळी त्यांनी एका नगरसेविकेला अनुलक्षून केलेल्या शेरेबाजीमुळे बराच गोंधळ माजला होता.
इतर सर्व १९ नगरसेवक त्यांच्याविरुद्ध असून याच आठवड्यात मुख्यमंत्र्यांची भेट घेऊन ते आपले गार्‍हाणे त्यांच्या कानावर घालणार होते. पण मुख्यमंत्री सध्या पुढील आठवड्यात व्हावयाच्या त्यांच्या चिरंजीवाच्या विवाहाच्या तयारीत व्यस्त असल्याने त्यांच्या डोक्याला ताप नको म्हणून हे नगरसेवक कळ सोसत असून १० रोजीचा विवाह स्वागत सोहळा आटोपताच नगराध्यक्षांविरुद्धचा बॉंब फुटण्याची शक्यता आहे. मात्र तसे झाले तर विरोधी पक्ष नसलेल्या या पालिकेत सत्ताधार्‍यांनीच ती भूमिका पार पाडली असे म्हणावे लागेल.
नवे पालिका मंडळ सत्तेवर येऊन सहा महिने उलटले तरी सरकारी अनुदानाची कोणतीच समस्या नसलेल्या या पालिकेत कोणतीच महत्त्वाची कामे झालेली दिसून येत नाहीत. साधा कचराही नीट उचलला जात नाही व त्या बाबत लोकांच्या प्रश्‍नांना आम्हांला उत्तर द्यावे लागते. पण नगराध्यक्षा आपल्या गुर्मीतच असतात व म्हणून आपण एकत्र आल्याचे एका नगरसेवकाने सांगितले.