भाजप उमेदवारांची यादी जून अखेरपर्यंत निश्‍चित

खासदार श्रीपाद नाईक यांची खास मुलाखत
पणजी, दि. २५ (किशोर नाईक गांवकर): गोवा मुक्तीनंतरच्या काळातील सर्वांत भ्रष्ट सरकार म्हणून विद्यमान कॉंग्रेस आघाडीने आपला लौकिक प्रस्थापित केला आहे. सामान्य सरकारी अधिकारी ते मंत्री अशी भ्रष्टाचाराची एक अभद्र मालिकाच बनली आहे. त्यामुळे सामान्य जनतेच्या प्रश्‍नांबाबत काहीही देणेघेणे नसलेल्या सरकारने त्यांना वार्‍यावरच सोडून दिले आहे. विद्यमान मंत्री फक्त गैरमार्गाने पैसा कमावण्यातच मग्न आहेत. ड्रग्ज, भूमाफियांचा वावर वाढला आहे. कायदा सुव्यवस्थेचे तीन तेरा वाजले आहेत. सामान्य जनता रस्त्यावर उतरली नाही असा एकही दिवस पाहायला मिळत नाही. या सरकारला सत्ताभ्रष्ट करण्यासाठी भारतीय जनता पक्ष पूर्णपणे सज्ज झाला असून आगामी विधानसभा निवडणुकीसाठीची जय्यत तयारी भाजपने सुरू केली आहे. येत्या जून अखेरपर्यंत भाजप उमेदवारांची यादी निश्‍चित होईल, अशी माहिती उत्तर गोव्याचे खासदार श्रीपाद नाईक यांनी दिली.
गोव्यातील विद्यमान कॉंग्रेस आघाडी सरकाराविरोधातील जनतेत खदखदत असलेला असंतोष व आगामी विधानसभा निवडणुकीचे पडघम या पार्श्‍वभूमीवर भाजपचे खासदार श्रीपाद नाईक यांच्याशी झालेल्या वार्तालापात त्यांनी ही माहिती दिली. गोवा पुढील पिढीसाठी शाबूत ठेवायचा असेल तर भ्रष्ट कॉंग्रेस सरकार उखडून टाकणे ही काळाची गरज आहे. जनतेचा खिसा कापून कमावलेला पैसा जनतेवरच फेकून त्यांना लाचार बनवण्याचा डाव गोमंतकीयांना कळून चुकला आहे व त्यामुळे सजग बनलेली जनता कॉंग्रेसला चांगलीच अद्दल घडवण्याच्या तयारीत आहे. यापूर्वी भाजपने दिलेल्या स्वच्छ प्रशासनाची आठवण लोक अजूनही काढतात व त्यामुळे जनता यावेळी भाजपच्या पाठीमागे भक्कमपणे उभी राहणार आहे, असा विश्‍वासही त्यांनी बोलून दाखवला.
आगामी विधानसभा निवडणुकीसाठी भाजपने उमेदवारांची छाननी सुरू केली आहे. यासंदर्भात पक्षाच्या गाभा समितीच्या बैठकाही सुरू झाल्या आहेत. या आठवड्यातच केंद्रीय नेत्यांबरोबर चर्चा होणार असून त्यात निश्‍चित व्यूहरचना व उमेदवार निवडीबाबतची आखणी केली जाणार आहे. यंदा उमेदवारीसाठी तरुण व महिलांचाही प्रामुख्याने विचार केला जाईल. भाजपने आपल्या संघटनात्मक रचनेत महिलांना ३३ टक्के स्थान दिले आहेच. आता विधानसभेतही महिलांना योग्य ते प्रतिनिधित्व देण्यात येईल व त्यासाठी महिलांनीच पुढाकार घेऊन आपली राजकीय ताकद दर्शवून पक्षाकडे हक्काने दावा करायला हवा, असा सल्लाही खासदार नाईक यांनी दिला.
भाजपच्या संघटनात्मक पातळीवर तळागाळातील कार्यकर्त्यांत नवचैतन्य निर्माण करण्याचीही तयारी पक्षाने चालवली आहे. पुढील विधानसभा निवडणूक ही गोव्याच्या अस्तित्वाचा लढाच असेल व त्यासाठी या लढ्यात प्रत्येकाने वाहून घेण्यासाठी लवकरच बूथ समित्यांपासून ते प्रदेश समितीपर्यंतच्या कार्यकर्त्यांसाठी मार्गदर्शन सत्रे सुरू होणार आहेत. विधानसभा प्रचार काळात कॉंग्रेसच्या भ्रष्टाचाराचे पाढेच जनतेसमोर वाचले जातील. कॉंग्रेसच्या चुकीच्या धोरणांमुळेच महागाईने उच्चांक गाठला आहे व सामान्य जनता या महागाईत पिंजून जात आहे. बेरोजगारीमुळे युवा पिढी भरकटत चालली असून त्यांचा या सरकारवरचा विश्‍वासच उडाला आहे. गोव्याचे पुढील राजकीय भवितव्य ठरवण्यात युवा व महिला महत्त्वाची भूमिका बजावणार आहेत. महिला व युवाशक्ती हीच भाजपची खरी ताकद आहे व त्या बळावरच कॉंग्रेसरूपी ‘भ्रष्टाचारासुरा’ला गारद करण्यात भाजप यशस्वी ठरेल, असा आत्मविश्‍वास श्रीपाद नाईक यांनी व्यक्त केला.