सत्तांतरासाठी म्हापसा पालिकेत पैशांचा खेळ

आमदार फ्रान्सिस डिसोझा यांची खंत
म्हापसा, दि. २४ (प्रतिनिधी): म्हापसा नगरपालिकेत नवीन मंडळ स्थापन होऊन केवळ सहा महिने उलटले तोच सत्तांतरांसाठी सुरू झालेले प्रयत्न हा निव्वळ पैशांचा खेळ असल्याची खंत म्हापशाचे आमदार फ्रान्सिस डिसोझा यांनी व्यक्त केली. सत्ताधारी मंडळातील उपनगराध्यक्ष विजेता नाईक या विरोधी गटाला जाऊन मिळाल्या आहेत. आपल्या प्रभागाचा विकास झाला नाही, ही त्यांची नाराजी निरर्थक आहे, असे सांगतानाच प्रभागवार विकासकामांची यादी नुकतीच तयार केली असताना विरोधकांच्या आमिषांना बळी पडून आपल्याच पायावर धोंडा मारून घेण्याचा हा प्रयत्न आहे, असेही आमदार डिसोझा म्हणाले.
नगरपालिका निवडणुका होऊन सहा महिने उलटले तोच नव्या मंडळावर अविश्‍वास ठराव दाखल होण्याचा प्रसंग म्हापसा पालिकेवर ओढवला आहे. या पालिकेवर भाजप समर्थक गटाने सत्ता स्थापन केल्याने कॉंग्रेसने ही पालिका आपल्या ताब्यात मिळवण्यासाठी जोरदार प्रयत्न चालवले आहेत. उपनगराध्यक्ष विजेता नाईक यांना आपल्या बाजूने ओढून नगराध्यक्ष सुधीर कांदोळकर यांच्या विरोधात अविश्‍वास ठराव दाखल करण्यात आला आहे. येत्या २ मे रोजी या ठरावावर मतदान होणार आहे. सत्ता व पैशांच्या जोरावर नगरसेवकांना आपल्या बाजूने ओढण्याचे असे हीन प्रकार घडत असतील तर भविष्यात स्थानिक स्वराज्य संस्थांची विश्‍वासार्हताच लोप पावण्याची जास्त शक्यता आहे, असे आमदार फ्रान्सिस डिसोझा म्हणाले. नव्या पालिका मंडळामार्फत म्हापशातील विविध विकासकामांना चालना देण्याचा संपूर्ण आराखडाच तयार करण्यात आला आहे. विशेष म्हणजे उपनगराध्यक्षांच्या प्रभागातूनच विकासकामांना प्रारंभही झाला आहे. या परिस्थितीत अचानक विकासकामांचे निमित्त पुढे करून विरोधकांना सामील होणे व नगराध्यक्षांवर अविश्‍वास ठराव दाखल करणे ही कृती कितपत योग्य आहे, याचा विचार संबंधितांनी करावा, असा सल्लाही त्यांनी दिला.
विरोधी गटाने मुख्यमंत्री दिगंबर कामत यांची भेट घेतली असता त्यांनी ५ कोटी रुपयांची मदत जाहीर केल्याचे सांगण्यात येते. मुळात म्हापसा पालिकेला ५ कोटी रुपये देण्याची तरतूद मुख्यमंत्र्यांनी अर्थसंकल्पात केली आहे काय, असा सवालही त्यांनी उपस्थित केला. अशा पद्धतीची आर्थिक मदत करायची असल्यास मुख्यमंत्र्यांनी या योजनेची जाहीर घोषणा करावी व तशी मदत सर्वच पालिकांना द्यावी, असे आवाहनही त्यांनी यावेळी केले.
सत्ताधारी पक्षाकडून पैशांचा वापर करून पालिका मंडळात फूट घालण्याचे व नगरसेवकांना फूस लावण्याचे प्रकार होणे ही निंदनीय गोष्ट आहे. म्हापसा पालिकेवर पहिल्यांदाच निवडून आलेल्या व उपनगराध्यक्ष प्राप्त झालेल्या विजेता नाईक यांचे मतपरिवर्तन जरूर होईल व त्या विरोधकांच्या आमिषांना बळी पडणार नाहीत, असा विश्‍वासही आमदार डिसोझा यांनी बोलून दाखवला.