Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Sunday, 22 February, 2009

साईबाबा पादुकांचे गोव्यात भव्य स्वागत

पादुका दर्शन ः आजचे कार्यक्रम
सकाळी ६ वाजता दर्शनसोहळा
दुपारी १२ वाजता मध्यान्ह आरती
दुपारी १२.३० वाजता महाप्रसाद भंडारा
सायं. ७ वाजता धूप आरती
रात्री १० वाजता भजन व आरती
दरम्यान, सकाळी ९ ते रात्रौ १० वाजेपर्यंत विख्यात कलाकारांचा सांस्कृतिक कार्यक्रम.

पणजी, दि. २१ (प्रतिनिधी): श्रद्धा व सबुरीची दिव्य शिकवण देऊन समाजाचा उद्धार करणारे थोर संत श्रीसाईबाबा यांच्या शिर्डीस्थित पादुकांचे आज गोवा-महाराष्ट्र सीमेवर अतिशय उत्साही व भावपूर्ण वातावरणात गोमंतकीयांनी स्वागत केले. सीमेवर पत्रादेवी येथे मुख्यमंत्री दिगंबर कामत यांनी, तर पणजीत जुन्या पाटो पुलावर विरोधी पक्षनेते तथा स्थानिक आमदार मनोहर पर्रीकर व महापौर टोनी रॉड्रिगीस यांनी या पवित्र पादुकांचे दर्शन घेऊन त्यांचे स्वागत केले.
श्रीसाईबाबांच्या चावडी पूजनाच्या शताब्दीनिमित्ताने श्रीसाई शिर्डी संस्थानातर्फे येथील कांपाल मैदानावर भाविकांच्या दर्शनासाठी या पादुका आणण्यात आल्या आहेत. या दुर्मीळ पादुकांचे रथातून पत्रादेवी ते येथील कांपाल मैदानावर नियोजित स्थळापर्यंत भव्य मिरवणुकीद्वारे आगमन झाले. ही मिरवणूक मार्गक्रमण करत असताना गोमंतकीयांच्या आदरातिथ्याचे उत्कृष्ट दर्शन घडले. ठिकठिकाणी अनेक भक्त, भाविक तथा राजकीय नेत्यांनी साई पादुकांचे विनम्रपूर्वक दर्शन घेऊन स्वागत केले. यावेळी काढण्यात आलेल्या दिंडीत भारतीय संस्कृतीला शोभणारी वेशभूषा करून महिला सहभागी झाल्या होत्या. या दिंडीत दादा महाराज सहभागी झाले होते. पुढे मालपे जंक्शनवर आमदार दयानंद सोपटे व लक्ष्मीकांत पार्सेकर, धारगळ महाद्वारावर पंचायतमंत्री बाबू आजगावकर, कोलवाळ पुलावर आमदार नीळकंठ हळर्णकर, करासवाडा जंक्शनवर आमदार फ्रान्सिस डिसोझा व नगराध्यक्ष रुपा भक्ता, ग्रीन पार्क जंक्शनवर आमदार दिलीप परुळेकर, पर्वरी आझाद भवनाजवळ आमदार दयानंद नार्वेकर यांनी "श्रीं'च्या पादुकांचे विधिवत पूजन करून दर्शन घेतले. रात्री ११ च्या सुमारास या पादुकांचे पणजीत जुन्या पाटो पुलावर आगमन झाल्यावर विरोधी पक्षनेते मनोहर पर्रीकर व महापौर टोनी रॉड्रिगिस यांनीही विधिवत पूजन करून दर्शन घेतले. त्यानंतर हा पादुका रथ जुन्या सचिवालयाजवळून पुढे चर्च चौक, महालक्ष्मी मंदिर, जुंता हाऊस, पोलिस ट्राफिक सेलजवळून डी. बी. मार्गावरून नियोजित स्थळी पोहोचला. पत्रादेवी येथे आज दुपारी २ वाजता हा पादुका रथ पोहोचल्यावर तेथे भक्तांचा महाप्रसाद व भजनाचा कार्यक्रम झाला. त्यानंतर मुख्यमंत्री श्री. कामत यांनी पादुकांचे विधिवत पूजन करून दर्शन घेतले. यावेळी त्यांच्यासोबत महसूलमंत्री जुझे फिलिप डिसौझा, पंचायतमंत्री बाबू आजगावकर, खासदार फ्रान्सिस सार्दीन, माजी केंद्रीयमंत्री ऍड्. रमाकांत खलप, माजी आमदार जितेंद्र देशप्रभू, विश्वस्त मंडळाचे डॉ. एकनाथ गोंडकर, अशोक खांबेकर, सुरेश वाबळे, शैलेश कुटे, उद्योगपती विश्वासराव धेंपे, आयोजन समितीचे अध्यक्ष अनिल खवंटे, शिर्डी संस्थानचे अध्यक्ष तथा आमदार जयंत ससाणे, सावंतवाडीचे शाहू महाराज, प्रा. अनिल सामंत, भंडारी समाजाचे मधुकर नाईक, गोवा ऍन्टिबायोटिक्स उद्योगाचे संचालक सूर्यकांत तोरस्कर, कदंब महामंडळाचे संचालक दशरथ महाले, प्रार्थना मोटे, जिल्हा पंचायत सदस्य सुप्रिया महाले, प्रदीप पालयेकर आधी मान्यवर उपस्थित होते. या पूजनानंतर पादुका रथाचे मार्गक्रमण सुरू झाले.

No comments: