आपल्याला तुरुंगात पाठविण्याचा केंद्र सरकारचा इरादा: मुलायमसिंग

इटावा, दि. २७ : आम्ही कोणालाही विरोध केलेला नाही, तरीही आमच्यासोबत भेदभावपूर्ण व्यवहार केला जात आहे. ज्या सरकारला आम्ही पतनापासून रोखले तेच सरकार आज आम्हाला तुरुंगात पाठविण्याची तयारी करीत आहे, असा आरोप करीत समाजवादी पार्टीचे प्रमुख व उत्तर प्रदेशचे माजी मुख्यमंत्री मुलायमसिंग यादव यांनी आज संपुआ सरकारवर ताशेरे ओढले.
आम्हाला अडकविण्यासाठी हे सरकार सीबीआयचा आधार घेत आहे. सीबीआय आमच्याविरोधात बनावट कागदपत्रे तयार करीत आहे. आमच्या समाजवादी पार्टीचे महासचिव अमरसिंग यांनी सीबीआयच्या चुका त्यांच्या वरिष्ठ अधिकाऱ्यांना दाखवून दिल्या आहेत. दुसऱ्या लोकांची संपत्ती माझ्या नावावर दाखविण्यात येत आहे, असेही मुलायमसिंग म्हणाले.
येथील सैफईस्थित चौधरी चरणसिंग पीजीआय कॉलेजमधील विद्यार्थ्यांच्या पारितोषिक वितरण समारंभाला मुलायमसिंग उपस्थित होते. याप्रसंगी बोलताना ते म्हणाले की, भारत कृषीप्रधान देश आहे. तरीही या देशात शेतकऱ्यंाची उपेक्षा होत आहे. पुरेशा सोईसुविधा उपलब्ध नसल्यामुळे कृषी उत्पादनाच्याबाबतीत आपला देश माघारला आहे.
आम्ही आंतरराष्ट्रीय स्तरावर कोठे आहोत, हे आम्हाला आज बघायला हवे, असेही यादव म्हणाले.