Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Saturday 28 February, 2009

लक्ष्मी सोनू राऊळ मुलापाठोपाठ मातेचाही मृत्यू, तळर्ण पेडणे भागावर शोककळा

मोरजी, दि. २७ (वार्ताहर): कुलदीपक जन्माला आला नाहीच; शिवाय घरची लक्ष्मीही जगाचा निरोप घेऊन अनंताच्या यात्रेला निघून गेली. त्यामुळे तळर्ण-पेडणे भागावर शोककळा पसरली आहे. लक्ष्मी सोनू राऊळ या महिलेची ही विदारक कहाणी. काल पहाटे तीनच्या सुमारास पेडणे येथील आझिलो इस्पितळात उपचार सुरू असताना त्यांचे निधन झाले.
पर्ये सत्तरी येथील लक्ष्मी यांचा विवाह वर्षभरापूर्वी तळर्णच्या सोनू राऊळ यांच्याशी झाला होता. लग्नाला अजून वर्षही पूर्ण झालेले नव्हते. बाळंतपणासाठी त्यांना आझिलो इस्पितळात दाखल करण्यात आले असता तीन दिवसांपूर्वी त्यांनी मृत मुलाला जन्म दिला. तेव्हा ऑपरेशन करावे लागले होते. तथापि, अतिरक्तस्त्रावामुळे काल पहाटे पहाटे तीनच्या सुमारास त्यांच्यावर दैवाने घाला घातला. त्यांच्या मृत्यूचे वृत्त येऊन थडकताच अनेकांना हुंदका अनावर झाला होता. अत्यंत मनमिळाऊ आणि सालस म्हणून त्या तळर्ण भागात परिचित होत्या.राऊळ परिवारावर तर त्यामुळे दुःखाचा डोंगर कोसळला आहे. लक्ष्मी यांच्या सासूबाईंना कसे बोलते करावे, असा प्रश्न निर्माण झाला आहे. गृहलक्ष्मीच आता पुन्हा कधीही दिसणार नाही, ही कल्पनाच त्यांना सहन करणे अशक्य झाले आहे. अहोरात्र त्यांच्या डोळ्याला धारा लागल्या आहेत. त्यांच्या घरातील प्रत्येक सदस्याची अवस्था तशीच झाली आहे. लक्ष्मी यांच्यावर आज (२७ रोजी) अंत्यसंस्कार करण्यात आले तेव्हा सर्वचजण सद्गदीत झाले होते. या मृत्यूप्रकरणी पेडणे पोलिस तपास करत आहेत.
---------------------------------------------------------------------------------
राऊळ टीचर कोठे गेल्या?
थर्मास तळर्ण येथे लक्ष्मी राऊळ ह्या के. जी.च्या मुलांना शिक्षण देत असत. आपल्याला प्रेमाने शिकवणाऱ्या राऊळ टीचर कोठे गेल्या, असा प्रश्न या लहानग्यांना पडला असून लक्ष्मी यांच्याबद्दल आपल्या पालकांकडे हे निष्पाप चिमुरडे विचारणा करत आहेत. त्यांना काय उत्तर द्यायचे हे पालकांनाही सुचेनासे झाले आहे.

No comments: