चिंचोणे येथे बिबट्या जेरबंद

शांतिवाडी चिंचोणे भागात जेरबंद करण्यात आलेला बिबट्या. (छाया: शांतम रेगे)

मडगाव, दि. २४ (प्रतिनिधी): शांतिवाडी -चिंचोणे भागात दहशत माजवून तेथील कोंबड्या व कुत्रे फस्त करण्यास चटावलेल्या आणखी एका बिबट्याला महिनाभरात जेरबंद करण्यात आले आहे. यापूर्वी गेल्या २८ जानेवारी रोजी अशाच प्रकारे एका बिबट्याला पकडून नंतर खोतीगाव अभयारण्यात पाठवण्यात आले होते.
आज पकडलेला बिबट्या कोवळा आहे व अजून त्याची पुरती वाढ झालेली नाही. एक मादी व तिचे हे दोघे बछडे यांना या भागात भटकताना लोकांनी पाहिले होते . नंतर त्यांनी पाळीव जनावरांना त्रास देण्यास सुरवात केल्यावर वन खात्याने तेथे पिंजरे लावले व गेल्या २८ जानेवारी रोजी त्यात एक बिबट्या सापडला. त्याला खोतीगावात नेऊन सोडल्यावर गेल्या ३१ जानेवारी पासून पुन्हा पिंजरा लावला. बिबट्याला लालूच दाखविण्यासाठी तेथे वेगवेगळे प्राणी ठेवले जात होते, पण इतके दिवस न फिरकलेला बिबट्या काल त्या बाजूने गेला व नेमका पिंजऱ्यात अडकला.
त्याला पकडण्यत येथील ज्युलिया क्वाद्रोस यांनी महत्त्वाची भूमिका पार पाडली. गेल्या वेळीही त्यांनीच पिंजरा लावला होता. दोन्ही बछडे जरी जेरबंद झालेले असले तरी त्यांची आई अजून मोकळीच आहे व तिला पकडण्यासाठी पुन्हा पिंजरा लावला जाणार असल्याचे सांगण्यात आले.
दरम्यान उपवनपाल एम. के. बिडी यांनी सलग दोन बिबटे पकडून दिल्याबद्दल ज्युलियो क्वाद्रूश यांचे अभिनंदन केले आहे. सायंकाळी उशिरा या बिबट्याची रवानगी खोतीगावकडे करण्यात आली.