काकोडा येथे ट्रक अपघातात सांगेचा तरुण जागीच ठार

कुडचडे, दि.२६ (प्रतिनिधी) - खनिजवाहू ट्रकांच्या बेदरकार वाहतुकीने काल किर्लपाल-दाभाळ येथे दोन विद्यार्थ्यांचे बळी घेऊन एक दिवसही उलटला नाही तोच, आज काकोडा येथे तंत्रनिकेतनच्या समोर सकाळी सव्वाआठच्या सुमारास ट्रकने एका तरुणाचा बळी घेतल्याने या परिसरात संतापाचे वातावरण पसरले आहे. विलियण सांगे भाटी येथील रामा किडू गावकर (३६) आज ट्रकखाली चिरडून ठार झाला. रात्री उशिरा ट्रकचालक ऍन्थनी पेद्रुपाल रॉड्रिगीस याला वालकिणी कॉलनी येथील घरातून पोलिसांनी ताब्यात घेतले.
सांगेहून सुटलेल्या "रियाना' या बसच्या मागून आपल्या स्कूटर क्रमांक जीए०१-बी-९७०९ वरून रामा गावकर कुडचडेच्या दिशेने जात होता. यावेळी नेहमीप्रमाणे ट्रकांची वर्दळ सुरूच होती. काकोडा तंत्रनिकेतनजवळ बसने वेग कमी केल्यावर रामा गावकरने आपली स्कूटर पुढे नेण्याचा प्रयत्न केला, त्यावेळी त्याची धडक बसल्याने तो खाली पडला व त्याचवेळी समोरून भरवेगाने येणारा ट्रक (क्रमांक जीए-०२-टी ९६०२)त्याच्यावरून गेला. त्याचे तेथेच निधन झाले. ट्रक तेथे न थांबताच गेला तर बस काही वेळ थांबून पुढे गेली. पोलिसांनी कुडचडेहून मडगावला निघालेल्या बसचालकाला घटनास्थळी आणले, त्यावेळी बसला स्कूटरची धडक बसली असल्याचे स्पष्ट झाले. दिवसभर पोलिसांनी ट्रकचालकाचा शोध घेऊन रात्री उपनिरीक्षक अर्जुन सांगोडकर यांनी त्याला वालकिणी येथे ताब्यात घेतले.
आजच्या या अपघातात ठार झालेला दुर्दैवी रामा गावकर हा गरीब कुटुंबातील असून, तो पानपट्टीचे छोटे दुकान चालवित होता.त्याच्या याच उत्पन्नावर पत्नी, रोहन (११) व राहुल (७) यांचा उदरनिर्वाह चालत असे. त्याच्या अकाली मृत्यूमुळे गावकर कुटुंबावर संकट कोसळले आहे. कर्ताच गमावल्याने त्या कुटुंबाची हलाखीची स्थिती झाली आहे. बाराजण येथे दोन दिवसांनी नाटक असल्याने रामा कुडचडे येथे खरेदीसाठी चालला होता, असे समजले.
खाण व्यवसायातील बेफाम ट्कवाहतूक अशा प्रकारे सामान्य माणसाची कर्नदकाळ ठरली असल्याची संतप्त प्रतिक्रिया या परिसरात व्यक्त होत आहे.