मोदी यांचे गोव्यात अभूतपूर्व स्वागत

वास्को, दि.२१ (प्रतिनिधी): गुजरातचे मुख्यमंत्री तथा भाजपचे वरिष्ठ नेते नरेंद्र मोदी यांचे आज संध्याकाळी ७.३० च्या सुमारास दाबोळी विमानतळावर आगमन झाले. गोव्यामध्ये भाजपच्या कार्यकर्त्यांच्या भेटीसाठी आलेल्या श्री. मोदी यांचे खासदार तथा भाजपचे प्रदेशाध्यक्ष श्रीपाद नाईक, विरोधी पक्षनेते मनोहर पर्रीकर, भाजपचे प्रदेश संघटनमंत्री अविनाश कोळी व असंख्य भाजप कार्यकर्त्यांनी विमानतळावर आदरपूर्वक स्वागत केले.नंतर श्री. मोदी हे कडक सुरक्षाव्यवस्थेत पणजीला जाण्यासाठी रवाना झाले.
श्रीपाद नाईक व श्री. पर्रीकर यांनी मोदी यांना पुष्पगुच्छ देऊन त्यांचे स्वागत केले तेव्हा मोदी यांच्या जयजयकाराच्या जोरदार घोषणा भाजप कार्यकर्त्यांनी दिल्या. याप्रसंगी मुरगावचे आमदार श्री मिलिंद नाईक, भाजपचे प्रवक्ते राजेंद्र आर्लेकर, भाजप सरचिटणीस गोविंद पर्वतकर, दक्षिण गोव्याचे विधानसभा भाजप उमेदवार नरेंद्र सावईकर, मुरगावचे माजी नगराध्यक्ष दीपक नाईक, नगरसेवक कृष्णा (दाजी) साळकर व मान्यवर यावेळी उपस्थित होते.
गोव्यात आगमन होताच श्री. मोदी यांनी श्रीपाद नाईक व मनोहर पर्रीकर यांना "गोव्यामध्ये काय चालले आहे,' असा पहिला प्रश्न केला. यानंतर विमानतळाच्या अतिमहनिय गृहात काही वेळ श्री. पर्रीकर यांच्याशी श्री. मोदी यांनी त्यांच्या गोव्याच्या भेटीबाबत चर्चा करून नंतर येथून पणजीकडे ते रवाना झाले.
यावेळी कडक सुरक्षा बंदोबस्त ठेवण्यात आला होता.श्री. मोदी एक दिवसाच्या गोवा दौऱ्यावर आलेले असून उद्या संध्याकाळी ते गोव्याहून रवाना होणार आहेत.