आणखी किती खुनांची कबुली?

फोंडा, दि.३१ (प्रतिनिधी) - सीरियल किलर महानंद नाईक याने आत्तापर्यत सोळा खुनांची माहिती दिली असून आणखी किती खुनांची वाच्यता करीत याचा अंदाज करणे कठीण बनले आहे.
महानंदची गेल्या रविवार २४ मे ०९ पासून कसून चौकशी सुरू करण्यात आली. त्याने पोलिस अधिकाऱ्यांची दिशाभूल करण्यासाठी सुरुवातीला खोटी माहिती दिली. खून करून युवतीचे मृतदेह पाण्यात टाकले असे सांगितले होते. यासंबंधी पोलिसांनी विविध पोलिस स्टेशनवर चौकशी केली असता महानंद पोलिसांची दिशाभूल करीत असल्याचे आढळून आले. जबानीत दिलेली माहिती खोटी असल्याचे तपासात उघड झाल्याने महानंदने अखेर खरी माहिती देऊन युवतीचे खून केलेल्या काही खऱ्या जागा दाखविल्या. त्यात अंजनी गावकर हिचा खून करण्यात आलेल्या राय येथून मानवी हाडे हस्तगत करण्यात आली. त्यानंतर बांबोळी येथे सुशीला फातर्पेकर हिचा खून केलेल्या जागेतून मानवी हाडे हस्तगत करण्यात आली. त्यानंतर दीपाली जोतकर (मडगाव), भागी सतरकर (केरी फोंडा), भागू उपसकर (सातपाल साकोर्डा), निर्मला आमोलकर (रिवण), शकुंतला कवठणकर (हातुर्ली) , गुलाबी गावकर (दाभाळ) यांच्या खुनांची कबुली दिली आहे.
महानंदने आतापर्यंत केलेले सर्व खून अत्यंत क्रूरपणे केलेले आहेत. खून करण्यात आलेल्या युवतींची ओळख पटू नये म्हणून त्यांच्या अंगावर कपडे ठेवत नव्हता. शकुंतलाचे नाव पोलिसांना मिळालेल्या यादीत नव्हते. हे नाव महानंदने सांगितले आहे. ती बेपत्ता असल्याच्या प्रकरणी तिच्या कुटुंबीयांनी तक्रार दाखल केलेली नव्हती, असे आढळून आले आहे. घरातून पैसे, दागिने घेऊन पळून गेलेल्या अन्य काही युवतींबाबत त्यांच्या पालकांनी पुढे येऊन तक्रार केल्यास महानंदने आणखी किती जणांचा खून केले हे स्पष्ट होऊ शकते. केवळ लोक लज्जेमुळे अनेक जण तक्रारी करण्यास पुढे येत नाहीत ही वस्तुस्थिती आहे. तक्रार केल्यानंतर तिचा पाठपुरावा आदी गोष्टी शक्य नसल्याने काहींनी यापूर्वीच तक्रारी केल्या नाहीत. काही बेपत्ता युवतीबाबत लोकांत चर्चा सुरू असते. मात्र, तक्रार नसल्याने कुणीही काहीच करू शकत नाही.
महानंद याने आत्तापर्यंत कबुली दिलेली खुनांची यादी -
१ - योगिता नाईक (नागझर कुर्टी) - मोर्ले सत्तरी - जानेवारी २००९ ,
२- दर्शना नाईक (तरवळे शिरोडा) - बांबोळी - सन १९९४,
३- वासंती गावडे (मडकई) - बेतोडा - सप्टेंबर १९९५,
४- केसर नाईक (पंचवाडी) - सांगे - जून २००७,
५- नयन गावकर (पंचवाडी) - केपे - मार्च २००८,
६ - सुनीता गावकर (बेतोडा) - आमोणा - मार्च २००३,
७ - अंजनी गावकर (निरंकाल) - राय - ऑगस्ट २००५,
८ - निर्मला घाडी ( बेतकी ) - बोरी - मे २००७,
९ - सूरत गावकर (पंचवाडी) - केपे - मार्च २००६,
१० - सुशीला फातर्पेकर ( कुडका) - बांबोळी - ऑक्टोबर २००७,
११ - दीपाली जोतकर (दवर्ली मडगाव) - फातर्पे कुंकळी २००७,
१२ - भागी सतरकर ( केरी फोंडा) - बोरी - २००५,
१३ - भागू उपसकर ( सातपाल साकोर्डा) - केपे २००७,
१४ - निर्मला आमोलकर ( रिवण) - वेर्णा - फेब्रुवारी २००८,
१५ - शकुंतला कवठणकर ( हातुर्ली) - कुंकळ्ये म्हार्दोळ - डिसेंबर २००५,
१६ - गुलाबी गावकर ( दाभाळ) - केरये खांडेपार - जुलै १९९४.