पर्रीकर इस्पितळातून घरी

पंधरा दिवस सक्त विश्रांतीचा सल्ला

मडगाव, दि. ३१ (प्रतिनिधी) : गेल्या आठवड्यात येथील अपोलो व्हिक्टर इस्पितळात दाखल करण्यात आलेले विरोधी पक्षनेते मनोहर पर्रीकर यांना आज इस्पितळातून घरी जाऊ देण्यात आले. मंगळवारी त्यांच्यावर अँजियोप्लास्टी करण्यात आली होती व नंतर शुक्रवारी इस्पितळातील अतिदक्षता विभागातून त्यांना पहिल्या मजल्यावर हलवण्यात आले होते.
अतिदक्षता विभागातून हलविण्यात आल्यानंतर गेले दोन दिवस पर्रीकर डॉक्टरांच्या निरिक्षणाखाली होते. त्यांच्या प्रकृतीत झालेली लक्षणीय सुधारणा पाहून सकाळी प्रकृतीच्या तपासणीनंतर त्यांना घरी देण्यात आले. पर्रीकरांवर अँजियोप्लास्टी करणारे डॉ. उदय खानेालकर यांनी त्यांची प्रकृती उत्तम असल्याचा हवाला दिला. गेल्या मंगळवारपासून हॉस्पितळात तळ ठोकून असलेले पर्रीकर यांचे थोरले बंधू अवधूत पर्रीकर व वडिलांच्या प्रकृतीची माहिती मिळताच अमेरिकेहून तातडीने गोव्यात दाखल झालेले पर्रीकरांचे ज्येष्ठ पुत्र उत्पल हे पर्रीकर यांना घेऊन सकाळी ११ वाजता घरी निघाले. यावेळी इस्पितळाजवळ भाजप कार्यकर्ते मोठ्या संख्येने जमले होते. मडगाव भाजप मंडलाचे अध्यक्ष नवनाथ खांडेपारकर, युवा मोर्चा नेते रुपेश महात्मे, सिध्दनाथ बुयांव, विलास साखरकर आदींचा त्यात समावेश होता.
पर्रीकरांना इस्पितळात दाखल केल्यापासून समाजाच्या विविध थरांतील लोकांची त्यांच्या प्रकृतीची चौकशी करण्यासाठी अपोलोत गर्दी केली होती. तथापि पर्रीकर यांना भेटण्यास लोकांना मनाई केल्याने निदान त्यांना दूरन तरी पाहता येईल या उद्देशाने त्यांचे मित्र, पक्षाचे कार्यकर्ते, आप्तेष्ट तसेच कुटुंबीय इस्पितळात जमत होते. आम्हाला त्यांना निदान दूरवरून तरी पाहू द्या अशी विनंती त्यांचे कार्यकर्ते करताना दिसत होते. गेल्या आठवडाभरांत मुख्यमंत्र्यांसह कित्येक आजी-माजी मंत्री, आमदार, खासदार तसेच समाजाच्या विविध थरांतील मान्यवरांनी अपोलोत येऊन त्यांच्या प्रकृतीची आपुलकीने विचारपूस केली.
मडगावमधील भाजपा नेते व कार्यकर्त्यांसाठी तर पर्रीकर यांना अपोलोंत दाखल केल्यापासून सदर हॉस्पितळ हे दुसरे घरच झाले होते. पहिल्या दिवसापासून ते आजच्या दिवशीपर्यंत ही मंडळी आळी पाळीने इस्पितळात हजर राहून पहारा देत होती. भाजपाच्या विविध समित्यांतील कार्यकर्त्यांचा समावेश होता.
पंधरा दिवस विक्षांतीचा सल्ला
मडगावः पर्रीकर यांच्यावर उपचार करणारे डॉ. खानोलकर यांनी, पर्रीकर यांच्या प्रकृतीत चांगली सुधारणा झाली असल्याचे पत्रकारांशी बोलताना सांगितले. मात्र त्यांनी आहारात पथ्य पाळायला हवे. किमान पंधरा दिवस त्यांना सक्तीच्या पूर्ण विश्रांतीची आवश्यकता असून नंतर ते आपले नियमित कारभार हाताळू शकतील असे त्यांनी पुढे सांगितले. योग्यवेळी योग्य इस्पितळात आणले गेल्याने त्यांना अगदी वेळेवर चांगले उपचार मिळाले याचा पुनरुच्चार त्यांनी यावेळी केला.

पर्रीकर कुटुंबीयांचे आवाहन
विरोधी पक्षनेते मनोहर पर्रीकर यांच्या प्रकृतीला वेगाने आराम पडावा यासाठी त्यांना दोन आठवडे सक्त विश्रांतीचा सल्ला डॉक्टरांनी दिला आहे. त्यामुळे या विश्रांतीच्या काळात त्यांची भेट घेण्याचा प्रयत्न त्यांचे हितचिंतक, चाहते व कार्यकर्ते यांनी टाळावा, असे विनंतीवजा आवाहन पर्रीकरांच्या कुटुंबीयांनी केले आहे.