"सिरियल किलर'च्या घराला अज्ञाताकडून आग

फोंडा, दि.१ (प्रतिनिधी) - फोंडा भागातील दोन युवतींचा खून केल्याची कबुली देणाऱ्या तरवळे शिरोडा येथील महानंद रामनाथ नाईक याचे घर आज रात्री अज्ञाताकडून लावण्यात आलेल्या आगीच्या भक्षस्थानी पडले.
शिरोडा येथील एका युवतीवरील बलात्कार प्रकरणातील संशयित महानंद नाईक याने दोन युवतीच्या खुनाची कबुली दिली. त्याने खून केलेली एक युवती तरवळे आणि दुसरी कुर्टी फोंडा गावातील आहे. सध्या संशयित महानंद नाईक याच्या संबंधी उलटसुलट चर्चा सुरू आहे. आणखी काही प्रकरणामध्ये संशयिताचा सहभाग असल्याची शक्यता लोकांकडून वर्तवण्यात येत आहे. या प्रकरणामुळे महानंद नाईक याच्याविरोधात काहींच्या मनात चीड निर्माण झाली असून त्यातूनच त्याच्या घराला आग लावल्याची शक्यता व्यक्त केली जात आहे.
महानंद नाईक याच्या घराला आग लागल्याची माहिती रात्री ८.२० च्या सुमारास फोंडा अग्निशामक दलाला मिळाली. फोंडा अग्निशामक दलाचा बंब केरी फोंडा येथे आग विझवण्यासाठी गेल्याने मडगाव येथील अग्निशामक दलाला या आगीची माहिती देण्यात आली. मडगाव, वेर्णा येथील अग्निशामक दलाच्या जवानांनी घटनास्थळी धाव घेऊन आग विझवण्याचे काम सुरू केले. सुमारे दोन तासांच्या प्रयत्नानंतर आगीवर नियंत्रण मिळवण्यास अग्निशामक दलाच्या जवानांना यश आले. मडगाव व वेर्णा येथील अग्निशामक दलाचे जवान आग विझवण्याचे काम सुरू असताना फोंडा अग्निशामक दलाचे जवान बंबासह घटनास्थळी पोहोचले.
या आगीत संपूर्ण घर खाक झाले असून लाखो रुपयांचे नुकसान झाले आहे. आगीची झळ शेजारच्या एका घरालासुद्धा बसली आहे. या प्रकाराची माहिती मिळाल्यानंतर फोंडा पोलिसांनी घटनास्थळी धाव घेतली. याप्रकरणी फोंडा पोलिस तपास करीत आहेत.