क्वात्रोचींविरुद्ध पुरावे आहेत सीबीआयच्या माजी प्रमुखांचा दावा

नवी दिल्ली : एकीकडे देशातील सीबीआयने बोफोर्स घोटाळ्या प्रकरणी इटालियन उद्योगपती क्वात्रोची यांना "क्लीन चिट' दिली असतानाच सीबीआयचे माजी संचालक जोगिन्दर सिंग यांनी क्वात्रोचींनी या प्रकरणी लाच घेतल्याबद्दल भारताकडे सबळ पुरावे असल्याचा दावा केला आहे.
१९९७ मध्ये बोफोर्स तोफ व्यवहारातील लाच प्रकरण उघडकीस आले. तेव्हा स्वीत्झर्लंड येथे जाऊन स्वीस बॅंकेने जारी केलेल्या ५०० पानांचे दस्तावेज भारतात आणणाऱ्यांमध्ये सीबीआयचे तत्कालीन संचालक जोगिन्दर सिंग यांचाही समावेश होता. आज हे प्रकरण नव्याने उद्भवल्यानंतर सिंग म्हणाले की, जेव्हा मी सीबीआयचे काम हाती घेतले तेव्हा मला लक्षात आले की, एक संपूर्ण खोली बोफोर्स घोटाळा प्रकरणातील दस्तावेजांनी भरलेली होती आणि त्या कागदपत्रांना कोणी हातही लावलेला नव्हता. मी हे प्रकरण हाती घेतले आणि स्वीत्झर्लंड येथून दस्तावेज आणून सरकारला तीन महिन्यांच्या आत अहवाल पाठवला होता. तो अहवाल स्वीकारायचा की नाही, हा सरकारचा प्रश्न आहे. आम्ही क्वात्रोचीविरुद्धचे पुरावे सोपवले होते. त्यांचे पुढे काही झाले नाही, याचा मला खेद वाटत नाही. कारण मी माझे काम पूर्ण केले होते, असेही ते म्हणाले.
इंटरपोलच्या रेड कॉर्नर नोटीसमधून क्वात्रोचीचे नाव हटवले जाणे अयोग्य आहे का, असे विचारले असता जोगिन्दर सिंग म्हणाले की, सीबीआय ही स्वतंत्र एजन्सी नाही. याचे सर्वाधिकार सरकारकडे आहेत. कदाचित आपण या मताशी सहमत नसाल. पण, ही वास्तविकता आहे.