मडगाव, दि. २०(प्रतिनिधी): डॉक्टर असल्याची बतावणी करून महिला वॉर्डात जाऊन महिला रुग्णांच्या अंगावरील दागिने लंपास करणारा भामटा मडगावात पोचला असून आज त्याने येथील हॉस्पिसियो इस्पितळातील एका बाळंतिणीच्या गळ्यातून साधारण साठ हजाराचे मंगळसूत्र घेऊन पलायन केले. यामुळे तेथे घबराट माजली आहे. यापूर्वी असाच प्रकार बांबोळी येथील गोवा वैद्यकीय महाविद्यालय इस्पितळात घडला होता.
आज सायंकाळी ६.३० च्या सुमारास डॉक्टरचा वेष परिधान केलेली सदर व्यक्ती अन्य दोघांसमवेत हॉस्पिसियोतील महिला चिकित्सा वॉर्डात शिरली. या वॉर्डाला भिडून प्रसूती विभाग आहे. सदर व्यक्तीने महिला वॉर्डातील रुग्णांवर नजर फिरविली व मग ती प्रसूती विभागात गेली व तेथील रुग्णांची पाहणी केली. नंतर तेथील सविता वेळीप या बाळंतिणीची तपासणी केल्याचे नाटक करून तिला इंजेक्शन देण्याच्या बहाण्याने तिच्या गळ्यातील मंगळसूत्र काढले. एवढ्यात तेथे परिचारिका आल्याचे पाहून त्या व्यक्तीने मागच्या दारातून पळ काढला. तोपर्यंत सविता हिला वास्तवाची जाणीव झाली व तिने घडला प्रकार सांगतात परिचारिकेने वरिष्ठांना माहिती दिली व पोलिसांना कळविले गेले. पोलिस दाखल होईपर्यंत सदर भामटे गायब झाले होते. पोलिस पुढील तपास करत आहेत.
Wednesday 21 April, 2010
Subscribe to:
Post Comments (Atom)
No comments:
Post a Comment