Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Thursday 22 April, 2010

पुंडलिक नायक यांना 'गोमंत शारदा' जाहीर

पणजी, दि. २१ : कला अकादमीचा अत्यंत प्रतिष्ठेचा असा "गोमंत शारदा' पुरस्कार प्रख्यात गोमंतकीय साहित्यिक पुंडलिक नायक यांना जाहीर करण्यात आला आहे. कला अकादमीचे अध्यक्ष प्रतापसिंह राणे यांच्या अध्यक्षतेखाली नुकत्याच झालेल्या बैठकीत सदर निर्णय घेण्यात आला. एक लाख रुपये रोख, मानपत्र आणि स्मृतिचिन्ह असे या पुरस्काराचे स्वरूप असून तो लवकरच एका खास समारंभात प्रदान करण्यात येणार आहे.
शिक्षणतज्ज्ञ व ज्येष्ठ साहित्यिक माधव कामत, डॉ. सोमनाथ कोमरपंत आणि कला अकादमीचे सदस्य सचिव डॉ. पांडुरंग फळदेसाई हे अंतिम निवड समितीचे अन्य सदस्य आहेत. तत्पूर्वी, अग्रणी साहित्यिक संस्था, समीक्षक, साहित्यिक आणि विवेकी वाचक यांनी केलेल्या शिफारशीमधून पुंडलिक नायक यांची एकमताने निवड करण्यात आली.
पुंडलिक नायक यांनी १९७२ पासून अविरतपणे साहित्य निर्मितीचे काम केले आहे. नाटक, कथा, कविता, कादंबरी, एकांकिका, नभोनाट्य आणि बालसाहित्य हे सर्व प्रकार त्यांनी समर्थपणे हाताळले आहेत. कला अकादमी, कोकणी अकादमी तसेच कोकणी भाषा मंडळाचे पुरस्कार त्यांच्या साहित्यकृतींना प्राप्त झालेले आहेत. गा आमी राखणे, पिशांतर, मुठ्य, अर्धूक हे कवितासंग्रह, बांबर, वसंतोत्सव, दायज, नवलकाणी व अच्छैव या कादंबरी, खण खण माती, रक्तखेव, राखण, सुरींग, सुर्यवाट, देमांद, मुक्तताय, शबय शबय भौजनसमाज, पिंपळ पेटला, श्रीविचित्राची जत्रा, दायज, चैतन्याक मठ ना ही नाटके, गावधनी गावकार, चौरंग, दिगंत हे एकांकिका संग्रह अशी विपुल साहित्यसंपदा त्यांच्या नावावर आहे.
कला अकादमीचे उपाध्यक्ष परेश जोशी आणि सदस्य सचिव डॉ. पांडुरंग फळदेसाई यांनी पुंडलिक नायक यांची भेट घेऊन त्यांना गोमंत शारदा पुरस्कार जाहीर झाल्याबद्दल त्यांचे पुष्पगुच्छ देऊन अभिनंदन केले.

No comments: