ती बैठक बेकायदा, ललित मोदींचा दावा

मुंबई, दि. २१ : मी चूक केलेली नाही, राजीनामा देणार नाही, अशी आक्रमक भूमिका घेणारे आयपीएल अध्यक्ष ललित मोदी यांनी बीसीसीआयने २६ रोजी बोलावलेली आयपीएलच्या गव्हर्निंग काऊन्सिलची बैठक बेकायदा असल्याचा दावा केला आहे. बीसीसीआयच्या अधिकाऱ्यांना आयपीएल गव्हर्निंग काऊन्सिलची बैठक बोलावण्याचा अधिकार नाही, असे सांगून मोदी यांनी या बैठकीला उपस्थित राहण्यास नकार दिला आहे.
भारतीय क्रिकेट नियामक मंडळाचे सरचिटणीस एस.श्रीनिवास यांनी २६ एप्रिल रोजी आयपीएलच्या गव्हर्निग काऊन्सिलची बैठक बोलविली आहे. परंतु श्रीनिवास यांना ही बैठक बोलविण्याचे अधिकार नसल्याची भूमिका ललित मोदी यांनी घेतली आहे. या बाबत ई-मेल त्यांनी गव्हर्निंग काऊन्सिलच्या सदस्यांना केला आहे.
बीसीसीआयच्या सूत्रांनी मोदी येवो अथवा न येवो बैठक निर्धारित तारखेला पार पडणार असल्याचे सांगितले आहे तर आयपीएल अध्यक्ष या नात्याने मला माझी बाजू मांडण्याची संधी बीसीसीआयने द्यायला हवी. त्यासाठी मला पुरेसा वेळ द्यायला हवा, असेही मोदी यांनी म्हटले आहे. २६ तारखेच्या बैठकीत बाजू मांडण्यासाठी आपण तयार नाही, असे त्यांनी म्हटले आहे.