Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Tuesday 20 April, 2010

३५० धार्मिक स्थळे पाडण्याचे कटकारस्थान

"हिंदू जनजागृती'ने फुंकलेरणशिंग..

पणजीत २२ रोजी खास सभा

पणजी, दि. १९ (प्रतिनिधी) - महामार्ग उभारण्याच्या नावाखाली सर्वोच्च न्यायालयाच्या आदेशाचा फायदा उठवत कॉंग्रेस सरकारने राज्यातील मंदिरे आणि घुमट्या अशी सुमारे ३५० धार्मिक स्थळे पाडण्याचे कटकारस्थान आखले असून त्याविरोधात येत्या २२ एप्रिल रोजी पणजीच्या आझाद मैदानावर हिंदू जनजागृती समितीनेखास सभेचे आयोजन केले आहे.
सायंकाळी ५.१५ वाजता ही सभा होणार असून राज्यातील देवस्थान समित्यांच्या पदाधिकाऱ्यांनी आणि भक्तगणांनी मोठ्या संख्येने उपस्थित राहावे, असे आवाहन समितीचे प्रवक्ते जयेश थळी यांनी आज येथे केले. ते पणजीत घेतलेल्या पत्रकार परिषदेत बोलते होते. यावेळी त्यांच्याबरोबर पर्वरी व तिसवाडी देवस्थान सुरक्षा समितीचे अध्यक्ष राजकुमार देसाई, चंद्रकांत गावस व आनंद प्रभुदेसाई उपस्थित होते.
राज्य सरकारने १५ मे पर्यंत या धार्मिक स्थळांवर कारवाई करण्याचा इशारा दिला आहे. त्यामुळे २२ रोजी होणाऱ्या या सभेत पुढील दिशा ठरवली जाणार असल्याचे यावेळी सांगण्यात आले.
गोवा ही मंदिरांची भूमी म्हणून ओळखली जाते. त्याची या सरकारने "मदिराभूमी' केली आहे. सार्कोडा येथील महादेव मंदिर आणि फार्तोडा येथील दामोदर मंदिरही या सरकारने अनधिकृत ठरवले आहे. या ३५० पैकी ७० पेक्षा जास्त मंदिरे पुरातन आहेत. पोर्तुगीजांच्या अत्याचारापासून आमच्या पूर्वजांनी ही मंदिरे वाचवून त्यांचा वारसा आमच्यापर्यंत पोहोचवला आहे. शेकडो वर्षांचा संपन्न इतिहास सांगणारी ही मंदिरे पाडण्यासाठी हे सरकार पुढे सरसावले आहे,' असा आरोप जयेश थळी यांनी केला.
सरकारने सरसकट मंदिरे किंवा घुमट्या न मोडता प्रत्येक देवस्थान समितीला विश्वासात घेऊन निर्णय घ्यावा, अशी सूचना यावेळी करण्यात आली. आतापर्यंत सरकारने कोणत्याही देवस्थान समितीला विश्वासात घेतलेले नाही, अशी माहिती थळी यांनी दिली. मंदिरे ही लोकांची श्रद्धास्थाने आहेत. लोकांनी घुमट्या उगाच बांधलेल्या नाहीत. त्यामागे अनेकांचा श्रद्धाभाव आहे. त्यामुळे सरकारने देवस्थान समित्यांना विश्वासात न घेतल्यास प्रकरण चिघळू शकते, असे मत राजकुमार देसाई यांनी व्यक्त केले. यावेळी चंद्रकांत गावस व आनंद प्रभुदेसाई यांनीही आपले मत व्यक्त केले.

No comments: