आता अमिताभही खोर्जुवेवासी!

पणजी, दि. २० : चित्रसृष्टीत "सणकू' म्हणून "प्रसिद्ध' असलेल्या नाना पाटेकर याच्यापाठोपाठ आता सुपरस्टार अमिताभ बच्चन आणि त्याचा सुपुत्र अभिषेक व सून ऐश्वर्या बच्चन यांनाही "गोवेकर' होण्याचे वेध लागले आहेत. त्यादृष्टीने गेल्या आठवड्यात किमान दोन ते तीन वेळा बच्चन कुटुंबीयांनी खोर्जुवे बेटाला भेट देऊन तेथील एका आलिशान घरकुलाची पाहणी केली. पोर्तुगीज स्थापत्य शैलीचा अप्रतिम नमुना असलेले हे आलिशान निवासस्थान बच्चन कुटुंबीयांच्या मनात चांगलेच भरल्याचे सांगण्यात येते. खोर्जुव्यातील निसर्गरम्य डोंगरावर बांधण्यात आलेल्या या बंगल्यात सर्व अत्याधुनिक सुविधा हात जोडून उभ्या आहेतच; शिवाय निळ्याशार पाण्याचा स्विमिंग पूलही उपलब्ध आहे. हे आलिशान घर पर्यटकांचे आकर्षण ठरलेल्या केबल स्टे हळदोणे-खोर्जुवे पुलापासून जवळच आहे.
मुळातच गोवा आणि अमिताभ हे समीकरण १९८० च्या दशकातच रुढ झाले आहे. तेव्हा "पुकार' या चित्रपटाच्या निमित्ताने "बिग बी'चा मुक्काम अनेक महिने गोव्यातच होता. त्यापूर्वी मेहमूदच्या "बॉंबे टू गोवा' या चित्रपटाने तिकीटबारीवर उत्तम यश संपादले व केवळ एका बसमध्ये चित्रीकरण करण्यात आलेल्या या चित्रपटाने अमिताभला झकास ब्रेक दिला होता. त्यात अरुणा इराणी त्याची नायिका होती. अमिताभ तेव्हाच गोवेकरांच्या आणि गोमंतभूमीच्या प्रेमात पडला. परशुरामाच्या या भूमीत आपली स्वतःची वास्तू असावी, असे स्वप्न "बिग बी'ने तेव्हापासून पाहिले होते. तथापि, नंतरच्या काळात त्याला याची फारशी आठवण उरली नाही. सध्या अमिताभ व अभिषेक "दम मारो दम' या चित्रपटाच्या चित्रीकरणासाठी काणकोणात तळ ठोकून आहेत. येथील निसर्गसंपदा व सौंदर्यावर अभिषेक भलताच लुब्ध झाला आहे. त्यामुळे तोही गोव्यात आपले "हॉलिडे होम' असावे या कल्पनेने थरारला आहे. जेव्हा बच्चन पितापुत्रांनी खोर्जुव्यातील त्या आलिशान बंगल्याची पाहणी केली तेव्हा तेथे उपस्थित असलेल्यांचा स्वतःच्या डोळ्यांवर विश्वासच बसला नाही. सध्या एक काश्मीरी व्यक्ती खोर्जुव्यातील त्या बंगल्याची मालक आहे. कोणी सांगावे, भविष्यात कदाचित तेथे बच्चन कुटुंबीय वावरताना दिसून येईल. तसे झाले तर खोर्जुवेवासीयांची कॉलर ताठ होईल यात शंका नाही!