मनु शर्माच्या जन्मठेपेवर सुप्रीम कोर्टाचे शिक्कामोर्तब

जेसिका लाल हत्या प्रकरण
नवी दिल्ली, दि. १९ - १९९९ मध्ये एका रेस्टॉरन्टमध्ये मॉडेल जेसिका लालची हत्या केल्याप्रकरणी कॉंग्रेस पक्षाचे वरिष्ठ नेते आणि माजी केंद्रीय मंत्री विनोद शर्मा यांचा मुलगा मनु शर्मा याला दोषी ठरवून ठोठावण्यात आलेल्या जन्मठेपेच्या शिक्षेवर आज सर्वोच्च न्यायालयाने शिक्कामोर्तब केले आहे.
मनु शर्मा हा हत्येच्यावेळी त्याठिकाणी उपस्थित होता, हे सरकारी वकिलांनी स्पष्टपणे सिद्ध केले आहे आणि त्यामुळे याबाबत शंका घेण्यास आता कुठलाही वाव नसल्याने मनु शर्माची जन्मठेपेची शिक्षा कायम ठेवण्यात येत आहे, असे न्या. पी. सथसिवम आणि न्या.स्वतंत्रकुमार यांच्या खंडपीठाने आपल्या निर्णयात म्हटले आहे.
या हत्याप्रकरणातील पुरावे नष्ट केल्याच्या आरोपाखाली उत्तरप्रदेशातील एक वादग्रस्त राजकीय नेते डी. पी. यादव यांचा मुलगा विकास यादव आणि अमरजितसिंग गिल यांना ठोठावण्यात आलेली चार वर्षांची सश्रम कारावासाची शिक्षाही न्यायालयाने कायम ठेवली आहे. या सगळ्यांना पुराव्याअभावी निर्दोष ठरविण्याचा सत्र न्यायालयाचा निर्णय रद्दबादल ठरविताना दिल्ली उच्च न्यायालयाने खात्रीलायक आणि पुरेशी कारणं दिली आहेत, असेही खंडपीठाने आपल्या निर्णयात स्पष्ट केले आहे.