१.७ लाखांचा चरस हरमल येथून जप्त

पणजी, दि. २१ (प्रतिनिधी): हरमल पेडणे येथील बॉम्बे बार ऍंड फॅमिली रेस्टॉरंटजवळ छापा टाकून दोघा व्यक्तींकडून सुमारे १ लाख ७० हजार रुपयांचा चरस जप्त करण्यात आल्याची माहिती अमलीपदार्थ विरोधी पथकाने दिली. काल रात्री ११.१५ वाजता हा छापा टाकण्यात आला. यात आंतोमारीयन फेलिक्स डिसोझा (२४, गिरकरवाडो हरमल) व बिपलब सरकार (३४, कोलकाता) या दोघांनाही अटक करण्यात आली आहे. अमलीपदार्थ विरोधी कायदा कलम २०(ब)(ii) नुसार अटक केली असून उद्या सकाळी त्यांना पोलिस कोठडी मिळवण्यासाठी न्यायालयात हजर केले जाणार आहे.
दोन तरुण हरमल येथील बॉम्बे बार ऍंड फॅमिली रेस्टॉरंटच्या समोर अमलीपदार्थ विक्री करण्यासाठी येणार असल्याची माहिती या पथकाला मिळाली होती. दोघे तरुण त्याठिकाणी आले असता त्यांची झडती घेण्यात आली. यात आंतोमारीयन याच्याकडे ५२० ग्रॅम चरस, तर बिपलब याच्याकडे ५५० ग्रॅम चरस आढळून आला. हा चरस जप्त करून दोघांनाही ताब्यात घेण्यात आले.
अमलीपदार्थ विरोधी पथकाचे अधीक्षक वेनू बंसल व उपअधीक्षक नरेश म्हामल यांच्या मार्गदर्शनाखाली उपनिरीक्षक सीताकांत नायक व सुनील गुडलर यांनी कारवाई केली. या छाप्यात पोलिस शिपाई महाबळेश्वर सावंत, इर्षाद वाटांगी, देवानंद परब यांची समावेश होता. अधिक तपास उपनिरीक्षक नायक करीत आहेत.