पणजी, दि. २१ (प्रतिनिधी): गोवा वैद्यकीय महाविद्यालयातील (गोमेकॉ) मुली "पुरवण्या'चे आमिष दाखवून पर्यटकांना हजारो रुपयांना लुटणारी टोळी पुन्हा एकदा सक्रिय झाली असून गुंटूर हैदराबाद येथील तरुणांच्या एका गटाला साडेआठ हजार रुपयात लुबाडण्यात आल्याची घटना घडली आहे.
आज दुपारी सुमारे १२ वाजता या तरुणांना मुली "पुरवण्या'चे आश्वासन देऊन थेट गोवा वैद्यकीय महाविद्यालय इस्पितळातील "एक्स रे' विभाग तसेच कॅन्टिमध्ये नेण्यात आले. तेथून जाणाऱ्या दोघा तरुणींच्या दिशेने बोट दाखवत त्यांना तुमच्याबरोबर पाठवले जाणार असल्याचे सांगण्यात आले. परंतु, त्यापूर्वी साठे आठ हजार रुपये द्यावे लागतील, असे सांगण्यात आले. गोमेकॉत असलेल्या "एटीएम'मधून काढलेले पैसे घेतल्यावर ते घेऊन संशयित मुलींना घेऊन येत असल्याचे सांगत इस्पितळात घुसले ते परतलेच नाही. तासनतास वाट पाहूनही कोणीच न आल्याने फसवणूक झाल्याची जाणीव त्या तरुणांना झाली. यावेळी दिलेल्या पैशांवर पाणी सोडून पोलिसांत तक्रार न करताच परतणे त्यांनी पसंत केले.
अधिक माहितीनुसार दोन दिवसांपूर्वी एका गट गोव्यात फिरण्यासाठी आला होता. काल दुपारी हा गट जुने गोवे येथे गेला असता गाइड असलेल्या एका तरुणाने त्यांना वैद्यकीय महाविद्यालयातील तरुणी पुरवल्या जातील, असे सांगून आपला मोबाईल क्रमांकही दिला. तसेच, उद्या संपर्क साधा असेही त्यांना सांगण्यात आले. त्यानुसार आज सकाळी त्या तथाकथित गाइडला दूरध्वनीवरून संपर्क साधण्यात आला. त्याने त्यांना बांबोळी येथील इस्पितळात भेटण्यासाठी बोलावले आणि मुली पुरवण्याच्या बतावणीने हजारो रुपयांना लुबाडले. काही महिन्यापूर्वी अशाच प्रकारे पर्यटकांना लुटणाऱ्या टोळीला पोलिसांनी ताब्यात घेतले होते. परंतु काही मोठ्या धेंडांच्या आशीर्वादाने ही टोळी पुन्हा एकदा सक्रिय झाली आहे. याच व्यवसायातून लाखो रुपये कमावले जात असून तुरुंगात असलेला अश्पाक बेंग्रे याचाही या व्यवसायात सहभाग असल्याचे पोलिस तपासात उघड झाले होते.
Thursday 22 April, 2010
Subscribe to:
Post Comments (Atom)
No comments:
Post a Comment