मुलीला अश्लील सीडी दिल्याने लाखाचा दंड

पणजी, दि. २१ (प्रतिनिधी): अल्पवयीन मुलीला अश्लील सीडी पाहण्यासाठी दिल्याचा आरोप सिद्ध झाल्याने मनोहर गंवडळकर (४५) याला बाल न्यायालयाने दोषी ठरवून एक लाख रुपयाचा दंड ठोठावला. दंडाची रक्कम भरण्यास आरोपीला अपयश आल्यास एका महिना कारावासाची शिक्षा, रक्कम जमा केल्यास ती पिडीत मुलीला देण्याचे आदेश देण्यात आले आहेत.
सदर तक्रारदाराने उसने घेतलेले पैसे द्यावे लागत असल्यानेच खोटी तक्रार करून फसवण्याचा प्रयत्न केला असल्याचा युक्तिवाद यावेळी आरोपीच्या वकिलाने न्यायालयात केला. कोणतीही आई आपल्या मुलीचे नाव उघड करून खोटी तक्रार देणार नसल्याचा सरकारी वकील पूनम भरणे यांचा मुद्दा यावेळी उचलून धरण्यात आला. तसेच, आरोपीने अल्पवयीन मुलीला अश्लील सीडी पाहण्यासाठी दिल्याचे न्यायालयात स्पष्ट झाल्याने त्याला दोषी धरून शिक्षा ठोठावण्यात आली.
आरोपी मनोहर हा तक्रारदाराच्या ओळखीचा असल्याने त्यांच्या घरी त्याची ये-जा असायची. दि. १८ जुलै ०६ रोजी तक्रारदाराच्या घरी कोणी नसल्याचे पाहून आरोपी त्यांच्या घरी आला. यावेळी त्याने घरातील अल्पवयीन मुलीला संगणकावर पाहण्यासाठी सीडी दिली. त्यामुळे मोठी बहीण आल्यानंतर त्या दोघींनी ती संगणकावर पाहण्यासाठी लावली. त्यात अश्लील दृश्ये असल्याचे आढळून आल्याने त्यांनी आपल्या आईला सीडी दिली व आरोपीने ती आम्हाला पाहण्यासाठी दिल्याचे सांगितले. त्यामुळे दुसऱ्या दिवशी आरोपीच्या विरोधात तक्रार दाखल करण्यात आली. यानंतर आरोपीला पुन्हा त्यांच्या घरी येण्याबाबत खडसावण्यात आले. तरीही त्याने दूरध्वनी करून धमकी देण्यास सुरुवात केल्याने महिला पोलिस स्थानकात तक्रार करण्यात आली व ती अश्लील सीडी देण्यात आली. न्यायालयात आरोपीच्या विरोधात भक्कम पुरावे सादर केल्याने त्याला दोषी ठरवून दंड ठोठावण्यात आला. या प्रकरणाचा तपास तत्कालीन डिचोली पोलिस स्थानकाचे पोलिस निरीक्षक नीलेश राणे व महिला पोलिस स्थानकाच्या निरीक्षक नूतन वेर्णेकर यांनी केला होता.