...अन् नॅनोच्या चाव्या मिळाल्या!

मुंबई, दि. १७ - आपल्या स्वप्नाची पूर्ती करत आणि सर्वसामान्यांना दिलेल्या वचनाची पूर्ती करत शुक्रवारी रतन टाटा यांनी नॅनोच्या चाव्या पहिल्या ग्राहकास सुपूर्द केल्या. अवघ्या एक लाखात कार देण्याचा शब्द टाटांनी खरा करून दाखवला असून, नॅनो कारची चावी अशोक विचारे या महाराष्ट्रातील ग्राहकाच्या हाती सुपूर्द करण्यात आली.
पाच वर्षांपूर्वी टाटा मोटर्सचे प्रमुख या नात्याने रतन टाटा यांनी सामान्यांच्या आवाक्यातील अशी एक लाखांची कार उपलब्ध करून देण्याचे आश्वासन दिले होते. २००३ ते २००८ या पाच वर्षांच्या कालावधीत टाटांच्या नॅनो या महत्त्वाकांक्षी प्रकल्पाला अनेक अडचणींचा सामना करावा लागला. पश्चिम बंगालमधील नंदीग्राममधील संघर्ष ते हा प्रकल्प गुजरातमध्ये हालवणे या प्रचंड अडचणींचा सामना करत टाटांनी नॅनो कार उपलब्ध करून देण्याचा आपला शब्द अखेर खरा करून दाखवला. प्रभादेवी येथील कॉंकर्ड या टाटाच्या शो रुममध्ये आज सायंकाळी तीन ग्राहकांना रतन टाटा यांच्या हस्ते नॅनो कारच्या चाव्या देण्यात आल्या.
नवी दिल्ली येथील "ऑटो एक्स्पो' मध्ये रतन टाटा यांच्या स्वप्नातील एक लाख रुपयांच्या कारचे १० जानेवारी २००८ रोजी अनावरण करण्यात आले होते. मंदीच्या गर्तेतही टाटांच्या नॅनोने तग धरला शिवाय नॅनोला बुकिंगही चांगले मिळाले. एक लाख रुपये किमतीच्या पहिल्या एक लाख बुकिंगसाठी ९ ते २५ एप्रिल या कालावधीत सुमारे ६ लाख १० हजार अर्ज विकले गेले होते. पैकी दोन लाख ३ हजार अर्जदारांनी बुकिंग केले. आता शुक्रवारपासून या ग्राहकांना नॅनोचे वितरण करण्यात आले. पहिल्या टप्प्यात एक लाख ५५ हजार नॅनो वितरित केल्या जातील. पहिल्या लकी ग्राहकापासून या अभिनंदनीय योजनेची सुरुवात झाली.