पणजी, दि. १४ : गोव्याची २००९-१० वर्षासाठी योजना ठरवण्यासाठी आज (मंगळवारी) मुख्यमंत्री दिगंबर कामत यांनी नवी दिल्ली येथे नियोजन आयोगाचे उपाध्यक्ष मॉंटेकसिंग अहलुवालिया आणि सदस्य नरेंद्र जाधव यांच्याशी चर्चा करून, विविध उपक्रमांसाठी राज्याला १३१० कोटी रुपयांची गरज असल्याचे त्यांना सांगितले.
राज्याच्या अंतर्गत भागात रस्ता बांधणी, २०११ साली आयोजित राष्ट्रीय खेळ, राज्याच्या मुक्तीचा सुवर्ण महोत्सव यासाठी १३१० कोटी रुपयांची गरज असल्याचे श्री.कामत यांनी यावेळी आयोगाला सांगितले. त्यांनी यासंबंधीच्या योजना आयोगासमोर लेखी स्वरूपात तपशीलासह मांडल्या. निधीअभावी राज्यात विकासकामे खोळंबली असल्याचे कामत यांनी आयोगाच्या निदर्शनास आणून दिले. रस्ता बांधणीसाठी ६१५ कोटी, राष्ट्रीय खेळांसाठी ५३५ कोटी तर मुक्तीचा सुवर्ण महोत्सव साजरा करण्यासाठी १०० कोटी, किनारा सुरक्षेसाठी १० कोटी आणि कला अकादमीद्वारे कला व संस्कृतीला उत्तेजन देण्यासाठी १० कोटींची गरज गोव्याला असल्याचे आयोगाला सांगण्यात आले. गोव्यातील स्थिती समजून घेण्यासाठी आयोगाचे सदस्य नरेंद्र जाधव राज्याला भेट देणार आहेत. मुख्य सचिव संजय श्रीवास्तव, मुख्यमंत्र्यांचे सचिव राजीव यदुवंशी, अर्थसचिव उदीप्त रे व संचालक आनंद शेरखाने यांचा शिष्टमंडळात समावेश होता.
Subscribe to:
Post Comments (Atom)
No comments:
Post a Comment