Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Monday 13 July, 2009

धारगळ अपघातात काका-पुतण्या ठार

पेडणे, दि. १२ (प्रतिनिधी) - धारगळ आरटीओजवळ सायंकाळी ७.३० वाजता भीषण अपघात होऊन काका - पुतण्या जागीच ठार झाले.
सविस्तर माहितीनुसार अमय - विर्नोडा, पेडणे येथील राजन उत्तम गावडे (३४), त्यांची पत्नी कीर्ती गावडे व पुतण्या दीप दिलीप गावडे (७) ही मंडळी आपली मोटरसायकल क्रमांक जीए-०३-ई-०७६७ या गाडीवरून म्हापसामार्गे विर्नोड्याला येत होते तर मारुती व्हॅगन आर क्रमांक जीए-०३-सी-८३९४ ही चारचाकी गाडी वारखंडमार्गे थिवी येथे जात असता धारगळ आरटीओ चेकनाक्याजवळ त्यांच्यात भीषण अपघात होऊन राजन उत्तम गावडे व त्यांचा पुतण्या दीप गावडे हे ठार झाले तर कीर्ती राजन गावडे ही गंभीररीत्या जखमी झाली. त्यांच्यावर बांबोळी येथे उपचार सुरू आहेत.
अपघाताची वार्ता पेडणे पोलिसांना समजताच पोलिस निरीक्षक उत्तम राऊत देसाई यांच्या मार्गदर्शनाखाली पोलिस उपनिरीक्षक अर्जुन नाईक यांनी घटनेचा पंचनामा केला. पोलिस रॉबर्ट वाहनाने घटनास्थळी जाऊन दशरथ परब या अधिकाऱ्याने धावाधाव करून जखमी अवस्थेतील व्यक्तींना आझिलो इस्पितळात नेले असता वाटेतच दीप गावडे मरण पावला तर राजन गावडे उपचार सुरू असताना मृत झाले. जखमी कीर्ती गावडे यांना बांबोळी इस्पितळात हालवण्यात आले.
राजन उत्तम गावडे यांचे लग्न मे महिन्यात झाले होते. ते आपली पत्नी व पुतण्याला सासुरवाडीला, रेवोड्याला घेऊन गेले होते. येताना वाटेतच अपघात होऊन त्यांचे निधन झाल्याने त्यांच्या गावात शोककळा पसरली आहे.
मोटरसायकल राजन गावडे चालवत होते तर मारुती व्हॅगन आर तुकाराम परब चालवत होते. उद्या १३ रोजी दोघांचेही मृतदेह नातेवाईकांच्या स्वाधीन करण्यात येणार आहेत.

No comments: