वास्को, दि. 25 (प्रतिनिधी) - तीन अनोळखी व्यक्ती संशयास्पदरीत्या मोटारसायकलवरून फिरत असल्याची माहिती सांखवाळचे पंच गिरीश पिल्ले यांनी वेर्णा पोलिसांना दिल्यावर त्यांनी तातडीने केलेल्या कारवाईत या तिघांना ताब्यात घेऊन घरफोडी व दुकानचोरी प्रकरणांतील सुमारे एक लाखांचा माल जप्त केला. काही चोऱ्यांमध्येही त्यांचा हात असण्याची शक्यता पोलिसांनी व्यक्त केली आहे.
आज पहाटे तीन वाजता तिघेजण झरींत, जुवारीनगर येथे मोटारसायकलवरून फिरत असल्याचे पिल्ले यांना दिसताच, त्यांनी याबाबत पोलिसांना माहिती कळविली. पोलिस उपनिरीक्षक जिबवा दळवी यांनी अन्य पोलिसांसह त्या ठिकाणी धाव घेतली, त्यावेळी त्या तिघांनी मोटारसायकल टाकून पळण्याचा प्रयत्न केला. त्यावेळी पोलिसांनी त्यांना अडवून त्यांना ताब्यात घेतले.
या तिघांकडून विजय तेंडुलकर यांच्या घरी व ईवान फर्नांडिस यांच्या दुकानात झालेल्या चोरीतील सामान पोलिसांनी ताब्यात घेतले. मातेश यलप्पा, सुनीलकुमार व रमेश गोलर अशी या चोरट्यांची नावे असल्याची माहिती पोलिसांनी दिली. त्यांच्या घरी चोरीचे सामान सापडल्याचे पोलिसांनी सांगितले. अन्य काही प्रकरणांत या चोरट्यांचा हात असल्याचा संशय असून पोलिस उपअधीक्षक देऊ बाणावलीकर यांच्या मार्गदर्शनाखाली उपनिरीक्षक दळवी तपास करीत आहेत.
Monday 26 May, 2008
Subscribe to:
Post Comments (Atom)
No comments:
Post a Comment