रेती वाहतूकदार आजपासून संपावर

मडगाव, दि.29 (प्रतिनिधी) - दक्षिण गोवा रेती वाहतूक ट्रक मालक संघटनेने रेती वाहतूक उद्या शुक्रवारपासून बेमुदत बंद ठेवण्याचा निर्णय घेतला आहे. गोवा वाहतूक खात्याने रेती वाहतुकीवर भरमसाट कर लादल्याच्या निषेधार्थ हा निर्णय घेण्यात आला आहे.
ही संघटना कारवारहून रेती आणते. संघटना दर घनमीटरवर वाहतूक खात्याला कररूपाने दोन रुपये देते. आता हा कर 20 रुपये केल्याने तो कमी करावा म्हणून संघटनेने प्रयत्न केले. मुख्यमंत्र्यांनाही त्यांनी याकामी साकडे घातले होते. त्यानुसार त्यांनी वाढीव कर आकारू नये, असा आदेश दिला. मात्र तो आदेश वाहतूक खात्याने मानला नाही. काल व आज पोळे येथे नाक्यावर खात्याने 60 ट्रक अडवून 20 रुपयांप्रमाणे करभरणा करण्यास सांगितले. यामुळे रेती वाहक ट्रक मालक संतापून त्यांनी ट्रक बंद केले. यावेळी मुख्यमंत्र्यांची त्यांनी भेट घेतली असता मुख्यमंत्र्यांनी आठ दिवसांत आपण त्यावर तोडगा काढू, असे सांगितले. मात्र, असे असले तरी उद्यापासून रेती वाहतूक बंद ठेवण्याचे संघटनेने ठरवले आहे.