भरधाव टिपरखाली विद्यार्थिनी ठार

रावणफोंड येथील अपघात
मडगाव, दि.१२ (प्रतिनिधी): रावणफोंड येथे आज भरधाव टिपरखाली सापडून जेसिला कार्व्हालोे (१६) ही शाळकरी मुलगी जागीच ठार झाली व पुन्हा एकदा राज्यातील अंदाधुंद सार्वजनिक वाहतुकीचा प्रश्र्न ऐरणीवर आला.
मयत जेसिला ही दहावीत शिकणारी मुलगी वार्षिक परीक्षा जवळ आल्याने शिकवणीवर्गाला सायकलवरून जाताना हा अपघात झाला. रावणफोंड-नावेली रस्त्यावर नाल्याजवळच्या अरुंद रस्त्यावर मागून येणाऱ्या जीए०२ -टी -७४३४ या टिपरने तिला ओव्हरटेक करून जाताना धडक दिली असता ती खाली पडली व टिपरच्या मागच्या टायरखाली सापडली . तिला जागीच मृत्यू आला. लगेच तिला हॉस्पिसियोत दाखल करण्यात आले. तेथे डॉक्टरांनी तिला मृत घोषित केले.
पोलिसांनी पंचनामा करून टिपरचालकाविरुध्द निष्काळजीपणे वाहन चालवून मृत्यूस कारणीभूत ठरल्याचा गुन्हा नोंदविला आहे. सदर रस्ता अत्यंत अरूंद असूनही राजकीय हस्तक्षेपामुळे त्याचे रुंदीकरण केले जात नाही असा आरोप होत आहे.