फियोनाचे बोलावते धनी वेगळेच

रवींचे स्पष्टीकरण
पणजी,दि.१५ (प्रतिनिधी): "स्कार्लेटची आई फियोना मॅकेवॉन ही आपण आणि ब्रार यांना केव्हापासून ओळखते," असा खडा सवाल गृहमंत्री रवी नाईक यांनी केला. प्रत्यक्षात तिला आपल्या मुलीच्या खुनाचे सोयरसुतक नाही. उलट ती वेगळ्याच कारणांस्तव बेताल वक्तव्ये करत आहे. यामागे तिचे बोलावते धनी वेगळेच आहेत, असे स्पष्टीकरण राज्याचे गृहमंत्री रवी नाईक यांनी "गोवादूत'शी बोलताना केले.
गृहमंत्री नाईक व पोलिस महासंचालक बी. एस. ब्रार यांचे अमलीपदार्थ माफियांशी साटेलोटे असल्याचा आरोप फियानो हिने केला आहे. त्याबाबत विचारले असता गृहमंत्री म्हणाले, स्वतःच्या किशोरवयीन मुलीला अनोळखी लोकांच्या हाती सोपवून ही महिला फिरायला जाते. तिने जर स्कार्लेटची जबाबदारी विश्वासातील व्यक्तीवर सोपवली होती तर पहाटेपर्यंत स्कार्लेट तेथील युवकांबरोबर शॅक्सवर काय करत होती? फियोनाचा स्कार्लेटवर वचकच नव्हता. तिने मुलीला मोकळे सोडले होते यातून उघड झाले आहे.
आता तिने प्रसारमाध्यमांकडे धाव घेऊन सुरू केलेली आरोपांची मालिका पाहता यामागे गोव्यातील व गोव्याबाहेरील काही राजकीय व्यक्ती तथा गोव्याच्या पर्यटनाला नख लावणाऱ्या शक्ती वावरत असल्याचा संशय गृहमंत्र्यांनी व्यक्त करतानाच तिचीदेखील चौकशी होऊ शकते, असे स्पष्ट संकेत दिले. तिने जाणीवपूर्वक या प्रकरणी दिशाभूल चालवली आहे. त्याद्वारे तपासकामात अडथळा निर्माण करण्याचे प्रयत्न ती करत असल्याचा आरोप नाईक यांनी केला.
स्कार्लेटप्रकरणाचा तपास कर्तबगार अधिकारी करत आहेत. यासंदर्भात दोघांना ताब्यात घेण्यात आले आहे. तपासात हयगय केल्याने संबंधित उपनिरीक्षक नेर्लन अल्बूकर्क यांनाही निलंबित करण्यात आले आहे, असे त्यांनी सांगितले.
याप्रकरणी पोलिसांकडून झालेली हयगय, गोमेकॉच्या दोन्ही शवचिकित्सा अहवालातील नेमक्या बदलाची कारणे, हणजूण येथील शॅक्सवर अमलीपदार्थाचा झालेला वापर याबाबत चौकशी सुरू असून ती उघड करण्याची आवश्यकता नाही, असे ते म्हणाले.
अमलीपदार्थ व्यवहारांबाबत पोलिसांनी कडक भूमिका घेतली आहे. राज्यात रेव्ह पार्ट्या बंद करण्यात आल्या आहेत. अमलीपदार्थ विरोधी पथके विविध ठिकाणी छापे घालत आहेत. स्कार्लेट प्रकरणात अमलीपदार्थ माफियांचा सहभाग आहे काय, असा सवाल केला असता तेही लवकरच उघड होईल, असे त्यांनी सूचित केले. गोव्यात पर्यटकांना संरक्षण देण्यात सरकार कोठेही कमतरता ठेवलेली नाही, असा निर्वाळा गृहमंत्र्यांनी दिला. जागतिक पातळीवर गोवा उत्कृष्ट पर्यटन स्थळ म्हणून नावारूपास आल्याने गोव्याची बदनामी करून येथील पर्यटकांना भीती घालण्याकरताच राष्ट्रीय तथा आंतरराष्ट्रीय पातळीवर काही लोकांनी अपप्रचार चालवला असावा, अशी शक्यता त्यांनी बोलून दाखवली.

...तर फियोनाचीही चौकशी
फियोनाने सनसनाटी वक्तव्ये करून पोलिसांची दिशाभूल चालवली आहे. मात्र, तिची एकूणच पार्श्वभूमी वादग्रस्त असल्याचे प्रथमदर्शनी दिसून येते. फियोनाला एका हल्ला प्रकरणात वर्षभराच्या कारावासाची शिक्षा झाल्याचे खुद्द तिच्या मुलानेच उघड केले आहे. त्यामुळे तिच्यासंदर्भातील सर्व तपशील आम्ही ब्रिटिश पोलिसांकडून मिळवण्याच्या प्रयत्नात आहोत. त्यानंतर फियोनाचीही चौकशी होऊ शकते, असे गृहमंत्र्यांनी स्पष्ट केले.