Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Friday 29 October, 2010

...आणखी एक तिकीट घोटाळा?

पणजी, दि. २८ (प्रतिनिधी)- पावसामुळे धुऊन गेलेल्या भारत वि. ऑस्ट्रेलिया सामान्याच्या तिकिटांचे पैसे घेण्यासाठी आलेल्यांमध्ये अडीच हजारांच्या एकाच क्रमांकाच्या दोन तिकीट मिळाल्याने "न झालेल्या सामन्याच्या तिकिटांचा घोटाळा' झाला आहे का? असा प्रश्न उपस्थित झाला आहे. या प्रकारावर अधिक प्रकाशझोत टाकण्यासाठी गोवा क्रिकेट संघटनेने या सामन्याचे तिकीट छापलेल्या छापखान्याच्या मालकाला समन्स पाठवून बोलावून घेतले आहे. तिकिटांचे पैसे परत घेण्यासाठी एकाच क्रमांकाची दोन तिकिटे बॅंकेत आल्याने हा प्रकार उघडकीस आला.
अडीच हजार रुपयांची तिकीट आणि फुकटात देण्यात आलेल्या "विशेष पास'चा एकच क्रमांक असल्याचे उघडकीस आले आहे. दक्षिणेकडच्या वरच्या स्टॅंडमधील तिकीट क्रमांक ०९१७३ ही अडीच हजार रुपयांची तिकीट ही एफ - ००२८ या आसन क्रमांकाची आहे. तर हाच आसन क्रमांक छापलेला विशेष पासही असल्याचे लक्षात आले आहे. त्याचप्रमाणे,विशेष पास क्रमांक ३२६३९ हा आसन क्रमांक एफ -०००४ यावर दाखवण्यात आला आहे. तर, या आसन क्रमांकाची अडीच हजार रुपयांची तिकीट आढळून आली आहे.
दोन तिकिटांमुळे बोगस तिकीट छापण्यात आल्याची शक्यता व्यक्त करण्यात येत आहे.
या विषयी गोवा क्रिकेट संघटनेचे सचिव प्रसाद फातर्पेकर यांना विचारले असता, ही तिकिटे छापताना चूक झाली असेल, आम्ही अधिक चौकशीसाठी पुणे येथील तिकिटे छापलेल्या छापखान्याच्या मालकाला चौकशीसाठी बोलावले आहे, असे सांगितले. सामना पाहण्यासाठी २२ हजार ५३६ प्रेक्षकांनी प्रवेश घेतला होता. त्यातील १४ हजार ३२० प्रेक्षक विशेष पासधारक होते. तर, ९ हजार १८० प्रेक्षक हे तिकिटावर आले होते. यात छापखान्याची चूक आढळून आल्यास त्याच्यावर कडक कारवाई केली जाईल, आम्ही अद्याप त्याला पूर्ण पैसे दिलेले नाही, असेही श्री. फातर्पेकर यांनी स्पष्ट केले.

No comments: