रेडी येथे नातीसह वृद्धेची अज्ञाताकडून निर्घृण हत्या

सावंतवाडी, दि.२० (प्रतिनिधी)- वेंगुर्ले तालुक्यातील रेडीमधील म्हारतळेवाडी येथे राहत्या घरात सुभद्रा बचाजी राणे (६५) व तिची नात श्रद्धा सखाराम परब (२०) यांची अज्ञाताने हत्या केल्याची खळबळजनक घटना उघडकीस आली आहे. हा प्रकार पहाटेच्या सुमारास झाला असून अज्ञाताविरुद्ध पोलिसांनी खुनाचा गुन्हा दाखल केला आहे.
आज सकाळी सुभद्रा हिचा जावई शाम मधुकर रेडकर हा म्हारतळेवाडी येथे सासूच्या घरी आला असता दरवाजा आतून बंद दिसला. त्याने दार ठोठावले परंतु आतून प्रतिसाद न आल्याने त्याने खिडकीतून आत पाहिले असता सुभद्रा व श्रद्धा यांचे मृतदेह रक्ताच्या थारोळ्यात पडलेले दिसले.
त्याने वेंगुर्ले पोलिसांत खबर दिली असता पोलिस निरीक्षक मोहिते यांनी घटनास्थळी धाव घेऊन तपास सुरू केला. दुपारी साडेतीनच्या सुमारास पोलिस पोहोचल्यानंतर दरवाजा तोडून मृतदेह बाहेर काढण्यात आले. मृतदेहांपाशी पडलेल्या काठ्या व धारदार शस्त्रांवरून झटापट झाल्याने दिसून येत होते.
चारच दिवसांपूर्वी कामगारांकरवी या घराच्या खिडक्यांच्या स्लायडिंगचे काम करण्यात आले होते. पैकी एक खिडकी उघडीच ठेवल्याचे दिसून आले असून तेथूनच खूनी निसटल्याचे रक्तात उमटलेल्या पावलांच्या ठशांवरून स्पष्ट झाले आहे. या हत्येत खिडक्यांचे दुरुस्ती काम करणाऱ्या कामगारांचाच हात असावा, असा संशय व्यक्त करण्यात येत आहे.
खून्याने नातीशी अतिप्रसंग करण्याचा प्रयत्न केला असता त्याला प्रतिकार केल्यामुळेच नातीचा तसेच वृद्धेचा डोक्यात लोखंडी सळीने वार करून खून करण्यात आला असावा, असा पोलिसांचा कयास आहे. या ठिकाणी खून्याचा माग काढण्यासाठी श्वान पथक आणले असता काही अंतरावर जाऊन ते पुन्हा माघारी फिरल्यामुळे घटनेनंतर खून्याने पलायनासाठी वाहन वापरले असावे, असा पोलिसांचा अंदाज आहे.