सव्वा लाखांचे दागिने काणकोणातून पळवले

काणकोण, दि. २९ (प्रतिनिधी): पोलिस चौकीपासून केवळ तीनशे मीटर अंतरावरील शेळेर येथील मधुकर कुडाळकर यांच्या घरात आज दिवसाढवळ्या अज्ञात चोरट्यांनी सुमारे सव्वा लाखांचे दागिने पळवून नेले. यात सोन्याच्या रिंगा, सोनसाखळी, हार, बांगड्या आदी ऐवजाचा समावेश आहे. कुडाळकर कुटुंबीयांचे दैव बलवत्तर म्हणून घरात असलेले अंदाजे पंधरा ते वीस हजार रुपये चोरांच्या हाती लागले नाहीत.
पोलिस सूत्रांनी दिलेल्या माहितीनुसार घराच्या मुख्य दरवाजाला लावलेले कुलूप तोडून चोरट्यांनी आत प्रवेश केला व हाती लागलेले दागिन्यांसह त्यांनी पळ काढला. सकाळी आठ ते दुपारी एकदरम्यान हा चोरीचा प्रकार घडला. कुडाळकर दांपत्य सरकारी सेवेत असल्याने घरात कोणीही नसल्याची संधी साधून चोरट्यांनी त्यांच्या घराला आपले लक्ष्य बनवले. पोलिसांनी ठसेतज्ज्ञांना पाचारण करून काही ठिकाणचे ठसे घेतले. तथापि, त्याचा फारसा उपयोग झाला नाही. निरीक्षक सूरज हळर्णकर तपास करत आहेत.
१ जुलै रोजी याच परिसरात राहणारे प्रदीप प्रभुदेसाई यांच्या घरात चोरी होऊन त्यांचे एक लाखाचे दागिने चोरण्यात आले होते. त्या चोरीचा छडा अजून लागलेला नाही. या भागात पुन्हा चोऱ्यांचे सत्र सुरू झाल्याने लोक भांबावले आहेत.