मेरशी अपघातात दुचाकीस्वार ठार

पणजी, दि. ३ (प्रतिनिधी)
मेरशी - कुंभारवाडा येथे आज सायंकाळी झालेल्या तीन वाहनांच्या विचित्र अपघातात दुचाकीस्वार गंभीर जखमी झाला. उपचारासाठी गोवा वैद्यकीय महाविद्यालय इस्पितळात दाखल केले असता डॉक्टरांनी त्याला मृत घोषित केले. मयत व्यक्तीचे नाव मस्तान जहांगीर असल्याची माहिती जुने गोवे पोलिसांनी दिली. जहांगीर हा दुचाकीने भाडी मारण्याचे काम करीत होता. या अपघाताला कारणीभूत ठरलेली सर्व वाहने पोलिसांनी जप्त केली आहेत.
अधिक माहितीनुसार, सायंकाळी सुमारे ५.३० वाजता हा अपघात झाला. मेरशी येथे रेती वाहतूक करणार्‍या जीए ०७ एफ ०९१४ क्रमांकाच्या ट्रकाला जीए ०७ ई ४९२९ क्रमांकाच्या व्हॅनने जोरदार धडक दिली. त्यानंतर व्हॅनने समोरून येणार्‍या टीव्हीएस दुचाकीला (क्रमांक जीए ०१ टी ६४०८) ठोकरले. यावेळी व्हॅनच्या चाकाखाली आलेला मस्तान सुमारे दहा मीटर लांब फरफटत गेला. त्यानंतर सदर व्हॅनने रस्त्याच्या कडेला असलेल्या कुंपणाला धडक दिली. घटनास्थळी जमलेल्या लोकांनी १०८ क्रमांकावर दूरध्वनी करून अपघाताची माहिती दिली. जुने गोवेहून मेरशीला पोहोचण्यास १०८ रुग्णवाहिका तब्बल ४५ मिनिटांचा अवधी लागला असल्याची माहिती उपस्थितांनी दिली.
यानंतर त्या ठिकाणी असलेल्या पोलिसांनी पंचनामा करून वाहने ताब्यात घेतली. या विषयीचा अधिक तपास उपनिरीक्षक हंसकूटी करीत आहेत.